گھر کا واحد مرد

مری باجی

بہت دیر سے مجھے آوازیں دے رہی تھیں

غالباً بازار جانا تھا

جب سے ابا کا انتقال ہوا ہے

وہ ہر چھوٹے بڑے کام کے لیے

جب بھی کہیں جاتیں مجھے ساتھ لے جاتی تھیں

کبھی کبھی تو مجھے بہت برا لگتا

آج بھی میں اپنا کھیل چھوڑ کر اٹھا

باجی نے سر پر چادر ڈالی امی سے پیسے لیے

اور میرا ہاتھ تھام کر چل دیں

میں بہن سے چمٹا ہوا چل رہا تھا

بازار اور گھر کی درمیانی تنگ گلی میں

سر شام تاریکی چھا جاتی تھی

مجھے وہاں سے گزرتے ہوئے ہمیشہ ہی خوف آتا تھا

بازار سے واپسی پر گلی میں داخل ہوتے ہی

مجھے خوف کے ساتھ کچھ عجیب سا احساس ہوا

میرے ہاتھ پر

بہن کی گرفت زیادہ ہی سخت ہو گئی تھی

نیم تاریک سنسان گلی کے بیچو بیچ چند نوجوان لڑکے

ہمارا راستہ روکے کھڑے تھے

وہ اچھے لوگ نہیں لگتے تھے

جب ہی تو میری باجی ان سے خوفزدہ لگ رہی تھیں

اچانک سب کچھ میری سمجھ میں آ گیا

میری بہن مجھے اپنے سہارے کے لیے

باہر لے کر جاتی تھیں

ابا کی وفات کے بعد گھر کے اندر میں ہی تو واحد مرد تھا

یہ احساس ہوتے ہی

میں نے باجی کے ہاتھ سے اپنا ہاتھ چھڑا لیا

اور ان کے ہاتھ کو

اپنی چھوٹی چھوٹی انگلیوں میں مضبوطی سے جکڑ کر

بڑے اعتماد کے ساتھ نپے تلے قدم اٹھاتا

ان آوارہ لڑکوں کے غول سے نکلتا چلا گیا

اس لمحے مجھے ایسا محسوس ہوا جیسے میں سات سال کے

کسی کمزور بچے کی بجائے

ستائیس سال کا ایک توانا مرد ہوں