ghar ki raunaq

ham apne ahl siyāsat ke dil se qaa.el haiñ

ki haq meñ qaum ke vo mādar-e-masā.il haiñ

qadam qadam pe na.e gul khilāte rahte haiñ

tarah tarah ke masā.il ugāte rahte haiñ

kabhī ye dhun hai ki sūboñ kī phir se ho tashkīl

kabhī ye zid hai ki had-biñdiyāñ na hoñ tabdīl

kabhī ye shor karo ḳhatm chor-bāzārī

munāfa-ḳhoroñ kī lekin na ho giraftārī

barā.e-bahs khaḌā hai kabhī ye hañgāma

libās qaum kā dhotī ho yā ki pājāma

har ek bahs meñ kuchh kisht-o-ḳhūñ zarūrī hai

nahīñ to jo bhī hai tahrīk vo adhūrī hai

har ek fitna-o-shorish kā āḳhirī jalva

muzāharāt o julūs o tasādum o balva

yūñhī uThā.ī ga.ī bahs jab zabāñ ke liye

''suḳhan bahāna huā marg-e-nā-gahāñ ke liye''

vo mas.ala ki jo dānish-kadoñ meñ hal hotā

balā se aaj agar tai na hotā kal hotā

use bhī ahl-e-siyāsat ne kar liyā iġhvā

aur is ke ba.ad vo sab kuchh huā jo honā thā

nifāq o buġhz o ta.assub ke aa ga.e rele

zabāñ kī aaḌ meñ ahl-e-fasād khul-khele

muḳhālifat meñ huī jā-ba-jā saf-ārā.ī

julūs le ke chale ik taraf se balvā.ī

laboñ pe ġhalġhala-e-''inqilāb zindābād''

magar diloñ maiñ dabā.e hue sharār-e-fasād

dukāneñ lauTī ga.iiñ rāh-gīr maare ga.e

gharoñ meñ aag lagī tifl o piir maare ga.e

vo pahlā shaḳhs jau khā kar chhure kā zaḳhm girā

maze kī baat to ye hai, ġharīb gūñgā thā

mazīd ye ki ise jaañ se mārne vaale

kisī zabān se vāqif na the ḳhud an-paḌh the

hum apne ahl siyasat ke dil se qael hain

ki haq mein qaum ke wo madar-e-masail hain

qadam qadam pe nae gul khilate rahte hain

tarah tarah ke masail ugate rahte hain

kabhi ye dhun hai ki subon ki phir se ho tashkil

kabhi ye zid hai ki had-bindiyan na hon tabdil

kabhi ye shor karo KHatm chor-bazari

munafa-KHoron ki lekin na ho giraftari

barae-bahs khaDa hai kabhi ye hangama

libas qaum ka dhoti ho ya ki pajama

har ek bahs mein kuchh kisht-o-KHun zaruri hai

nahin to jo bhi hai tahrik wo adhuri hai

har ek fitna-o-shorish ka aaKHiri jalwa

muzaharaat o julus o tasadum o balwa

yunhi uThai gai bahs jab zaban ke liye

suKHan bahana hua marg-e-na-gahan ke liye

wo masala ki jo danish-kadon mein hal hota

bala se aaj agar tai na hota kal hota

use bhi ahl-e-siyasat ne kar liya ighwa

aur is ke baad wo sab kuchh hua jo hona tha

nifaq o bughz o tassub ke aa gae rele

zaban ki aaD mein ahl-e-fasad khul-khele

muKHalifat mein hui ja-ba-ja saf-arai

julus le ke chale ek taraf se balwai

labon pe ghalghala-e-inqilab zindabaad

magar dilon main dabae hue sharar-e-fasad

dukanen lauTi gain rah-gir mare gae

gharon mein aag lagi tifl o pir mare gae

wo pahla shaKHs jau kha kar chhure ka zaKHm gira

maze ki baat to ye hai, gharib gunga tha

mazid ye ki ise jaan se marne wale

kisi zaban se waqif na the KHud an-paDh the