ghar

pyāre beTe tū ne iiñT gaare cement aur sariye vaalā makān to banā liyā hai

merī duā hai ki ye mohabbat amn ḳhushī aur ḳhush-hāl se bharā ghar ban jaa.e

is ke darvāze se koī badī aur burā.ī dāḳhil hī na hone paa.e

khiḌkiyoñ se zindagī-baḳhsh havā to zarūr andar aa.e lekin har tūfān bāhar hī rah jaa.e

terā ye ghar vo kashtī ban jaa.e jo tujhe har bhañvar se ba-ḳhair nikāl le jaa.e

garmiyāñ aa.eñ to ghar qurbatoñ kī garmī se damak uTThe

ḳhizāñ aa.e to dīvāroñ par saje fan-pāroñ se bahār sharmā jaa.e

bahār aa.e to mahsūs ho ki terā ghar hī is kā mamba.a hai

bāhar kitnā hī shor-o-ġhauġhā ho tere ghar meñ sukūn-o-rāhat ho

bāhar kitnā hī añdherā ho tere ghar meñ na.e hausloñ ke charāġh raushan hoñ

tere ghar kī chār-dīvārī is qile kī fasīl ban jaa.e

jis meñ nafrat naqb na lagā sake

mohabbat jis ke andar mahfūz ho

ek dūsre kī mohabbat

insān kī mohabbat

ḳhudā kī mohabbat

ghar kar jaa.e

ghar

pyare beTe tu ne inT gare cement aur sariye wala makan to bana liya hai

meri dua hai ki ye mohabbat amn KHushi aur KHush-haal se bhara ghar ban jae

is ke darwaze se koi badi aur burai daKHil hi na hone pae

khiDkiyon se zindagi-baKHsh hawa to zarur andar aae lekin har tufan bahar hi rah jae

tera ye ghar wo kashti ban jae jo tujhe har bhanwar se ba-KHair nikal le jae

garmiyan aaen to ghar qurbaton ki garmi se damak uTThe

KHizan aae to diwaron par saje fan-paron se bahaar sharma jae

bahaar aae to mahsus ho ki tera ghar hi is ka mamba hai

bahar kitna hi shor-o-ghaugha ho tere ghar mein sukun-o-rahat ho

bahar kitna hi andhera ho tere ghar mein nae hauslon ke charagh raushan hon

tere ghar ki chaar-diwari is qile ki fasil ban jae

jis mein nafrat naqb na laga sake

mohabbat jis ke andar mahfuz ho

ek dusre ki mohabbat

insan ki mohabbat

KHuda ki mohabbat

ghar kar jae

ghar