ghaTa chhai to kya

chhaT ga.e jab aap hī uudī ghaTā chhā.ī to kyā

turbat-e-pāmāl ke sabze pe lahar aa.ī to kyā

jab zarūrat hī rahī baaqī na lahn-o-rañg kī

koyaleñ kūkīñ to kyā sāvan kī rut aa.ī to kyā

hijr ke ālām se jab chhuT chukī nabz-e-nashāt

ab havā ne ḳhār-o-ḳhas meñ ruuh dauḌā.ī to kyā

ho chukī zauq-e-tabassum hī se jab begānagī

ab chaman-afroz phūloñ ko hañsī aa.ī to kyā

muḌ chukī jab maut ke jaade kī jānib zindagī

ab kisī ne āfiyat kī raah dikhlā.ī to kyā

har nafas ke saath dil se jab dhuāñ uThne lagā

bādaloñ se chhan ke ab ThanDī havā aa.ī to kyā

sāmne jab aap ke gesū kī lahreñ hī nahīñ

badliyoñ ne charḳh par ab zulf bikhrā.ī to kyā

ho chukā pāyāb jab bahr-e-sar-o-barg-e-shabāb

ab samundar kī javānī baaḌh par aa.ī to kyā

ġhuncha-e-ahd-e-tarab hī mil chukā ab ḳhaak meñ

ḳhāk-e-gulshan ab gul-e-tar ban ke itrā.ī to kyā

miT chuke jab vālihāna bāñkpan ke valvale

aa.ī ab doshīza-e-mausam ko añgḌā.ī to kyā

khul chukā jab parcham-e-ġham zindagī ke qasr par

ab havāoñ ne kamar paudoñ kī lachkā.ī to kyā

āñsuoñ meñ bah ga.iiñ jab ḳhuun kī jaulāniyāñ

jañgaloñ kī chhāñv meñ barsāt iThlā.ī to kyā

'josh' ke pahlū meñ jab tum hī machal sakte nahīñ

phir ghaTā ke dāmanoñ meñ barq lahrā.ī to kyā

chhaT gae jab aap hi udi ghaTa chhai to kya

turbat-e-pamal ke sabze pe lahar aai to kya

jab zarurat hi rahi baqi na lahn-o-rang ki

koyalen kukin to kya sawan ki rut aai to kya

hijr ke aalam se jab chhuT chuki nabz-e-nashat

ab hawa ne KHar-o-KHas mein ruh dauDai to kya

ho chuki zauq-e-tabassum hi se jab beganagi

ab chaman-afroz phulon ko hansi aai to kya

muD chuki jab maut ke jade ki jaanib zindagi

ab kisi ne aafiyat ki rah dikhlai to kya

har nafas ke sath dil se jab dhuan uThne laga

baadalon se chhan ke ab ThanDi hawa aai to kya

samne jab aap ke gesu ki lahren hi nahin

badliyon ne charKH par ab zulf bikhrai to kya

ho chuka payab jab bahr-e-sar-o-barg-e-shabab

ab samundar ki jawani baDh par aai to kya

ghuncha-e-ahd-e-tarab hi mil chuka ab KHak mein

KHak-e-gulshan ab gul-e-tar ban ke itrai to kya

miT chuke jab walihana bankpan ke walwale

aai ab doshiza-e-mausam ko angDai to kya

khul chuka jab parcham-e-gham zindagi ke qasr par

ab hawaon ne kamar paudon ki lachkai to kya

aansuon mein bah gain jab KHun ki jaulaniyan

jangalon ki chhanw mein barsat iThlai to kya

'josh' ke pahlu mein jab tum hi machal sakte nahin

phir ghaTa ke damanon mein barq lahrai to kya