ghoDa

maiñ ghoḌe ke baare meñ bahut kuchh jāntā huuñ

vo avvalīn shajar hai

vo baañs ke jañgal kī tarah rātoñ raat ugtā hai

aur havāoñ ko sansanāte hue guzarne kī ijāzat detā hai

ghoḌe ko ḳhudā ne 'afzāl' ahmad sayyad kī nazm kī tarah banāyā hai

ḳhuub chauḌā

siyāh miTTī se phūTtā huā

siyāh āsmān se utartā huā

parvāz par āmāda

ḳhudā ne ek ulūhī ġhusse

pasīne

aur dhuup bhare ghaas ke maidān ko gūñdh kar

us kī hinhināhaT tartīb dī hai

us kī Tāpoñ kī dhamak meñ

qazā-o-qadr ke be-muravvat faisle jaḌ diye haiñ

aur us kī raftār ke daa.eñ baa.eñ

vo dhuñdle manzar phailā diye haiñ

jin meñ Thiik se kuchh patā nahīñ chaltā ki kyā ho rahā hai

ḳhudā ne ghoḌe kī raftār ke sāmne bhī manzar phailā.e haiñ

bilkul siidh meñ dekho to vo vāzeh aur tai-shuda nazar aate haiñ

yahāñ tak ki

vo niim ho kar

daa.eñ aur baa.eñ taqsīm na ho jaa.eñ

aur dhuñdlā na jaa.eñ

ḳhudā ne ghoḌe kī raftār ke aqab meñ

nīstī bichhā dī hai

yā ek āvāz ki

sarvam dukkham dukkham

aur ghoḌā in sab bātoñ se mil kar banā hai

main ghoDe ke bare mein bahut kuchh jaanta hun

wo awwalin shajar hai

wo bans ke jangal ki tarah raaton raat ugta hai

aur hawaon ko sansanate hue guzarne ki ijazat deta hai

ghoDe ko KHuda ne 'afzal' ahmad sayyad ki nazm ki tarah banaya hai

KHub chauDa

siyah miTTi se phuTta hua

siyah aasman se utarta hua

parwaz par aamada

KHuda ne ek uluhi ghusse

pasine

aur dhup bhare ghas ke maidan ko gundh kar

us ki hinhinahaT tartib di hai

us ki Tapon ki dhamak mein

qaza-o-qadr ke be-murawwat faisle jaD diye hain

aur us ki raftar ke daen baen

wo dhundle manzar phaila diye hain

jin mein Thik se kuchh pata nahin chalta ki kya ho raha hai

KHuda ne ghoDe ki raftar ke samne bhi manzar phailae hain

bilkul sidh mein dekho to wo wazeh aur tai-shuda nazar aate hain

yahan tak ki

wo nim ho kar

daen aur baen taqsim na ho jaen

aur dhundla na jaen

KHuda ne ghoDe ki raftar ke aqab mein

nisti bichha di hai

ya ek aawaz ki

sarwam dukkham dukkham

aur ghoDa in sab baaton se mil kar bana hai