ghuTan ka ilaj

chalo kisī kī mazammat kareñ zabāñ kholeñ

bahut dinoñ se jo taalā lagā hai hoñToñ par

to dil meñ kitnī ghuTan kitnī zahr-nākī hai

kahīñ ye zahr ugal deñ kisī ko gaalī deñ

magar ye log to shāyad sab apne jaise haiñ

shikastagī kā ik ā.īna jin ke chehre haiñ

hamāre naam ki milte hue se naam haiñ sab

alag alag haiñ kahāñ ham ik izhdihām haiñ sab

ik izhdihām jo pur-shor shāh-rāhoñ par

ḳhamosh reñgtā rahtā hai sar jhukā.e hue

na aañkh uThāne kī mohlat na lab-kushā.ī kī taab

nigāh-o-dil kī asīrī ḳhamoshiyoñ kā azaab

use burā na kaheñ kyoñ na us ke saath chaleñ

dil apnā us ko dikhā.eñ dukh us kā ham bhī suneñ

ki is tarah bhī to mumkin hai is ghuTan kā ilaaj

chalo kisi ki mazammat karen zaban kholen

bahut dinon se jo tala laga hai honTon par

to dil mein kitni ghuTan kitni zahr-naki hai

kahin ye zahr ugal den kisi ko gali den

magar ye log to shayad sab apne jaise hain

shikastagi ka ek aaina jin ke chehre hain

hamare nam ki milte hue se nam hain sab

alag alag hain kahan hum ek izhdiham hain sab

ek izhdiham jo pur-shor shah-rahon par

KHamosh rengta rahta hai sar jhukae hue

na aankh uThane ki mohlat na lab-kushai ki tab

nigah-o-dil ki asiri KHamoshiyon ka azab

use bura na kahen kyon na us ke sath chalen

dil apna us ko dikhaen dukh us ka hum bhi sunen

ki is tarah bhi to mumkin hai is ghuTan ka ilaj