گھٹن کا علاج

چلو کسی کی مذمت کریں زباں کھولیں

بہت دنوں سے جو تالا لگا ہے ہونٹوں پر

تو دل میں کتنی گھٹن کتنی زہر ناکی ہے

کہیں یہ زہر اگل دیں کسی کو گالی دیں

مگر یہ لوگ تو شاید سب اپنے جیسے ہیں

شکستگی کا اک آئینہ جن کے چہرے ہیں

ہمارے نام کہ ملتے ہوئے سے نام ہیں سب

الگ الگ ہیں کہاں ہم اک اژدہام ہیں سب

اک اژدہام جو پر شور شاہراہوں پر

خموش رینگتا رہتا ہے سر جھکائے ہوئے

نہ آنکھ اٹھانے کی مہلت نہ لب کشائی کی تاب

نگاہ و دل کی اسیری خموشیوں کا عذاب

اسے برا نہ کہیں کیوں نہ اس کے ساتھ چلیں

دل اپنا اس کو دکھائیں دکھ اس کا ہم بھی سنیں

کہ اس طرح بھی تو ممکن ہے اس گھٹن کا علاج