gita

go ye novel kā zamāna hai magar aaj bhī dost

is kī azmat meñ koī farq nahīñ aaya hai

is kī ta.alīm nahīñ ek hī maz.hab ke liye

ise paḌh kar sabhī insān mazā lete haiñ

duur karne ke liye dil se jahālat kā hijāb

faiz imkān bhar is se vo uThā lete haiñ

haath un ke kabhī gauhar na lage haiñ na lageñ

tah meñ sāgar kī jo insān nahīñ jā sakte

dekh giitā meñ haiñ mastūr vo anmol ratan

ḳhvāb meñ bhī jinheñ kam-aql nahīñ pā sakte

kis liye ishrat-e-fānī pe miTe jaate ho

raaz hastī kā hai kyā tum ne kabhī sochā hai

pūchh lo jā ke mai-e-ishq ke matvāloñ se

ḳhvāb sā ḳhvāb hai duniyā kī haqīqat kyā hai

jab na ho qaid-e-alā.iq na rahe shor-e-ḳhudī

chain paane lage dil gosha-e-tanhā.ī meñ

to samajh lo ki qarīb aa ga.ī merāj-e-hayāt

lutf milne lage insāñ ko jo yaktā.ī meñ

be-badal ilm-e-ilāhī kā sahīfa hai ye

nāḳhudā kashti-e-dil kā ise jaano samjho

sarfarāzī se jo jiinā hai tumheñ duniyā meñ

is ko apnāo phir o mere vatan ke logo

ahl-e-dil is ko haiñ siine se lagā.e rahte

abadī zaat kā ye tohfa-e-rūhānī hai

is ke aurāq meñ simTā huā vo nuur hai jo

vaqt kī qaid se āzād hai lā-fānī hai

ye vo hiirā hai chamak jis kī nahīñ kam hogī

is kī azmat meñ koī farq nahīñ aa.egā

go ye nowel ka zamana hai magar aaj bhi dost

is ki azmat mein koi farq nahin aaya hai

is ki talim nahin ek hi mazhab ke liye

ise paDh kar sabhi insan maza lete hain

dur karne ke liye dil se jahaalat ka hijab

faiz imkan bhar is se wo uTha lete hain

hath un ke kabhi gauhar na lage hain na lagen

tah mein sagar ki jo insan nahin ja sakte

dekh gita mein hain mastur wo anmol ratan

KHwab mein bhi jinhen kam-aql nahin pa sakte

kis liye ishrat-e-fani pe miTe jate ho

raaz hasti ka hai kya tum ne kabhi socha hai

puchh lo ja ke mai-e-ishq ke matwalon se

KHwab sa KHwab hai duniya ki haqiqat kya hai

jab na ho qaid-e-alaiq na rahe shor-e-KHudi

chain pane lage dil gosha-e-tanhai mein

to samajh lo ki qarib aa gai meraj-e-hayat

lutf milne lage insan ko jo yaktai mein

be-badal ilm-e-ilahi ka sahifa hai ye

naKHuda kashti-e-dil ka ise jaano samjho

sarfaraazi se jo jina hai tumhein duniya mein

is ko apnao phir o mere watan ke logo

ahl-e-dil is ko hain sine se lagae rahte

abadi zat ka ye tohfa-e-ruhani hai

is ke auraq mein simTa hua wo nur hai jo

waqt ki qaid se aazad hai la-fani hai

ye wo hira hai chamak jis ki nahin kam hogi

is ki azmat mein koi farq nahin aaega