gireban

maiñ ne gulāb ke paude se pūchhā

aaj kal tum par phuul kam aur kāñTe ziyāda aa rahe haiñ

kahne lagā maiñ tumhārā be-dām ġhulām huuñ

in dinoñ tum dushmanī ke kāñTe bone meñ masrūf ho

tumheñ kāñToñ kī zarūrat hai

jis roz tum dostī ke safar par nikaloge

dekhnā maiñ kaise phūloñ ke ambār lagā dūñgā

maiñ ne fāḳhta se kahā

duniyā meñ har taraf bad-amnī phailī hai

vo tumhārī shāḳh-e-zaitūn vo shāḳh-e-amn kahāñ ga.ī

bolī maiñ ne to lā kar tumhāre haath meñ de dī thī

tumhī kahīñ rakh kar bhuul ga.e ho

dekho shāyad tumhārī bandūq kī naalī meñ na paḌī ho

maiñ ne tāroñ bhare āsmān kī taraf hasrat se dekhā

insān ke din kab phireñge

ye qatl-o-ġhārat ye ḳhūn-ḳharāba kab ḳhatm hogā

ye zer-dastoñ kā sabr ye zabardastoñ kā jabr

ye luuT aur jhuuT āḳhir hamāre nasīb meñ kyuuñ likh diye ga.e haiñ

ek sitāra TuuTā

aur mere dil ke taḳhta-e-siyāh par raqam kar gayā

''jhāñk lo apne girebāñ meñ''

main ne gulab ke paude se puchha

aaj kal tum par phul kam aur kanTe ziyaada aa rahe hain

kahne laga main tumhaara be-dam ghulam hun

in dinon tum dushmani ke kanTe bone mein masruf ho

tumhein kanTon ki zarurat hai

jis roz tum dosti ke safar par nikaloge

dekhna main kaise phulon ke ambar laga dunga

main ne faKHta se kaha

duniya mein har taraf bad-amni phaili hai

wo tumhaari shaKH-e-zaitun wo shaKH-e-amn kahan gai

boli main ne to la kar tumhaare hath mein de di thi

tumhi kahin rakh kar bhul gae ho

dekho shayad tumhaari banduq ki nali mein na paDi ho

main ne taron bhare aasman ki taraf hasrat se dekha

insan ke din kab phirenge

ye qatl-o-ghaarat ye KHun-KHaraba kab KHatm hoga

ye zer-daston ka sabr ye zabardaston ka jabr

ye luT aur jhuT aaKHir hamare nasib mein kyun likh diye gae hain

ek sitara TuTa

aur mere dil ke taKHta-e-siyah par raqam kar gaya

jhank lo apne gireban mein