girhen khulti nahin

kaisī girhoñ meñ tār-e-nafas hai ye uljhā huā

saarī peshāniyoñ par lakīroñ kā phailā huā jaal hai

is meñ jakḌī ga.ī

muskurāhaT kahīñ

dhajjiyāñ chaar atrāf uḌne lagīñ

kis kā malbūs hai

har nagar har galī

ḳhauf hī ḳhauf hai

aglī baaī hai kis kī

kisī ko patā tak nahīñ

muñh chhupā.e hue

ta.ane, dushnām sahte haiñ jo ajnabī

apne hī to nahīñ

chār-sū hai rageñ kāTtī zamharīrī huā

sard-mehrī ke barfāb mausam meñ

ThiThure hue hoñT haiñ

aur zabāñ kī rageñ bhī tashannuj se khichne lagīñ

kaisā āseb-e-vahshat hai

kyuuñ sar se Taltā nahīñ

āyateñ bhī hameñ bhuul jaane lagīñ

jibra.īl-e-amīñ

sūratunnās aur al-falaq paḌh ke phūñko

diloñ meñ

aqīdoñ kī girheñ paḌī haiñ

ye ham se to khultī nahīñ!

kaisi girhon mein tar-e-nafas hai ye uljha hua

sari peshaniyon par lakiron ka phaila hua jal hai

is mein jakDi gai

muskurahaT kahin

dhajjiyan chaar atraf uDne lagin

kis ka malbus hai

har nagar har gali

KHauf hi KHauf hai

agli bai hai kis ki

kisi ko pata tak nahin

munh chhupae hue

tane, dushnam sahte hain jo ajnabi

apne hi to nahin

chaar-su hai ragen kaTti zamhariri hua

sard-mehri ke barfab mausam mein

ThiThure hue honT hain

aur zaban ki ragen bhi tashannuj se khichne lagin

kaisa aaseb-e-wahshat hai

kyun sar se Talta nahin

aayaten bhi hamein bhul jaane lagin

jibrail-e-amin

suratunnas aur al-falaq paDh ke phunko

dilon mein

aqidon ki girhen paDi hain

ye hum se to khulti nahin!