girl-friend

surma.ī ret kī pagDanDī par

sañg-e-marmar kī chaTānoñ kā dil-āvez shabāb

shaam ke sho.ala-nafas rañg meñ tahlīl huā

haath meñ haath liye baḌhte rahe do saa.e

aur ḳhāmosh chanāroñ kī sulagtī āñkheñ

mahv-e-dīdār rahīñ

do javāñ ḳhvāb, khule jism, barahna jaame

ek hī lai meñ dhaḌakte hue do hañgāme

jaam the haath meñ donoñ ke magar ā.ankhoñ meñ

ek machlā huā armān thā mad-hoshī kā

kyā junūñ-ḳhez nazāra thā ham-āġhoshī kā

lazzat-e-vasl se sarshār the dīvāne do

daf.atan duur jūñhī shaam Dhale diip jale

koī bikhrī huī zulfoñ ko jhaTak kar bolā

mujh ko milnā hai kisī aur se bhī jaane do

surmai ret ki pagDanDi par

sang-e-marmar ki chaTanon ka dil-awez shabab

sham ke shoala-nafas rang mein tahlil hua

hath mein hath liye baDhte rahe do sae

aur KHamosh chanaron ki sulagti aankhen

mahw-e-didar rahin

do jawan KHwab, khule jism, barahna jame

ek hi lai mein dhaDakte hue do hangame

jam the hath mein donon ke magar aaankhon mein

ek machla hua arman tha mad-hoshi ka

kya junun-KHez nazara tha ham-aghoshi ka

lazzat-e-wasl se sarshaar the diwane do

dafatan dur junhi sham Dhale dip jale

koi bikhri hui zulfon ko jhaTak kar bola

mujh ko milna hai kisi aur se bhi jaane do