girya

tumhāre dukh ne

mere andar ek shahr-e-mātam daryāft kiyā

jahāñ har roz mere janm par jashn-e-girya manāyā jaatā hai

tum apnī hañsī kā tohfa

kaalī īñToñ se banā.e ga.e us taaq

meñ rakh do

jahāñ charāġh kī ḳhāmoshī

aur raat kī siskiyāñ sāñpoñ kī tarah

sarsarātī haiñ

hāñ!! sāñpoñ se yaad aayā

aaj sāñpoñ se visāl kī raat hai

aañsū ḳhushk haiñ ġhusl kaise karūñ?

mere zaḳhmoñ se girne vaale kiiḌe

mere saa.e se baḌe ho rahe haiñ

mujhe apnī nigahbānī kā mat kaho

maiñ to ḳhud apnī hifāzat meñ chorī ho jaatā huuñ

shiryānoñ ke sad-rāhe par lahū rāsta

bhuul gayā hai

shahr mujhe merī aañkh se nahīñ dekhtā

ā.īna mujh par nigāh paḌte hī be-aks ho jaatā hai

dekho....

raat ke kashkol meñ

ek nigāh kī bhiik bhī nahīñ

puure chāñd ko tanhā.ī ne toḌ Daalā

ab us kī kirchiyāñ merī ashtray

meñ paḌī haiñ

kaho ki kyā kahūñ?

āvāzoñ ke nīlām-ghar meñ mujhe to

chup lag jaatī hai!

tumhaare dukh ne

mere andar ek shahr-e-matam daryaft kiya

jahan har roz mere janm par jashn-e-girya manaya jata hai

tum apni hansi ka tohfa

kali inTon se banae gae us taq

mein rakh do

jahan charagh ki KHamoshi

aur raat ki siskiyan sanpon ki tarah

sarsaraati hain

han!! sanpon se yaad aaya

aaj sanpon se visal ki raat hai

aansu KHushk hain ghusl kaise karun?

mere zaKHmon se girne wale kiDe

mere sae se baDe ho rahe hain

mujhe apni nigahbani ka mat kaho

main to KHud apni hifazat mein chori ho jata hun

shiryanon ke sad-rahe par lahu rasta

bhul gaya hai

shahr mujhe meri aankh se nahin dekhta

aaina mujh par nigah paDte hi be-aks ho jata hai

dekho

raat ke kashkol mein

ek nigah ki bhik bhi nahin

pure chand ko tanhai ne toD Dala

ab us ki kirchiyan meri ashtray

mein paDi hain

kaho ki kya kahun?

aawazon ke nilam-ghar mein mujhe to

chup lag jati hai!