girya-e-tahayyur

baḌā hī pyārā lage hai ye tifl-e-girya-kunāñ

kisī khilaune ke chhinne pe ro rahā hai bahut

sitāra āñkhoñ meñ motī chamak rahe haiñ bahut

hai apne kārgar-e-hastī meñ mahv-e-rāh

mile jo mohlat-e-masrūfiyat to dekhe use

abhī vo aa.egī aur be-qarār ho ke use

uThā ke bāñhoñ ke halqe meñ pyaar kar legī

phir apne malgaje āñchal meñ us ke āñsūoñ ko

vo jaise salmā sitāre kī tarah Tāñkegī

haiñ merī āñkhoñ meñ kab se sitāre raqs-kunāñ

baḌī ummīd se maiñ āsmān taktī rahī

vo apne kār-e-jahāñ meñ lagā huā hai magar

agar vo aa nahīñ saktā to itnā hī kar de

mirī talab ko vahīñ se vo be-talab kar de

mire savāl kī tāqat ko chhīn le mujh se

maiñ thak chukī huuñ tahayyur kī āh-o-zārī se

baDa hi pyara lage hai ye tifl-e-girya-kunan

kisi khilaune ke chhinne pe ro raha hai bahut

sitara aankhon mein moti chamak rahe hain bahut

hai apne kargar-e-hasti mein mahw-e-rah

mile jo mohlat-e-masrufiyat to dekhe use

abhi wo aaegi aur be-qarar ho ke use

uTha ke banhon ke halqe mein pyar kar legi

phir apne malgaje aanchal mein us ke aansuon ko

wo jaise salma sitare ki tarah Tankegi

hain meri aankhon mein kab se sitare raqs-kunan

baDi ummid se main aasman takti rahi

wo apne kar-e-jahan mein laga hua hai magar

agar wo aa nahin sakta to itna hi kar de

meri talab ko wahin se wo be-talab kar de

mere sawal ki taqat ko chhin le mujh se

main thak chuki hun tahayyur ki aah-o-zari se