globalization

ka.ī sadī kī mashaqqat pe fikrmand hue

ḳhayāl-e-yār fazāoñ ke dard-mañd hue

shu.ūr fikr se sargoshiyoñ meñ kahne lage

abhī to qudratī vasā.il kī shanāsā.ī hai

abhī to lab pe ka.ī nuqra.ī sadā.eñ haiñ

abhī to aadmī ko aadmī pahchāntā hai

abhī to mausamoñ kī rañgateñ nahīñ badlīñ

shu.ūr fikar se sargoshiyoñ meñ kahne lage

abhī to shams ke māthe pe koī bal bhī nahīñ

abhī to chāñd kī hai.at bhī hū-ba-hū hai vahī

abhī to ahl-e-fan ke haath bhī salāmat haiñ

abhī to zehn meñ ḳhush-hāl soch raqsāñ haiñ

shu.ūr fikr se sargoshiyoñ meñ kahne lage

abhī bhī lab pe muskurāhaToñ kī aas liye

ba-zāhir daur-e-nau ke naġhme gungunāte hue

abhī bhī sāhil-e-dariyā pe zulf khole hue

mire ḳhayāl kī sargoshiyāñ ye kahtī haiñ

ka.ī sadī kī mashaqqat pe zarb kar degā

nayā saverā hameñ sharmsār kar degā

kai sadi ki mashaqqat pe fikrmand hue

KHayal-e-yar fazaon ke dard-mand hue

shuur fikr se sargoshiyon mein kahne lage

abhi to qudrati wasail ki shanasai hai

abhi to lab pe kai nuqrai sadaen hain

abhi to aadmi ko aadmi pahchanta hai

abhi to mausamon ki rangaten nahin badlin

shuur fikar se sargoshiyon mein kahne lage

abhi to shams ke mathe pe koi bal bhi nahin

abhi to chand ki haiat bhi hu-ba-hu hai wahi

abhi to ahl-e-fan ke hath bhi salamat hain

abhi to zehn mein KHush-haal soch raqsan hain

shuur fikr se sargoshiyon mein kahne lage

abhi bhi lab pe muskurahaTon ki aas liye

ba-zahir daur-e-nau ke naghme gungunate hue

abhi bhi sahil-e-dariya pe zulf khole hue

mere KHayal ki sargoshiyan ye kahti hain

kai sadi ki mashaqqat pe zarb kar dega

naya sawera hamein sharmsar kar dega