gomti

mere bachpan kī mirī pyārī sahelī gomtī

tujh pe kyā guzrī hai ki tū yuuñ simaT kar rah ga.ī

vo tirī maddham suroñ meñ ḳhush-bayānī kyā huī

vo tirī be-sāḳhta tarz-e-ravānī kyā huī

shoḳhī-e-raftār par terī fidā thā lucknow

har qadam par kah rahā nām-e-ḳhudā thā lucknow

kab bhalā apnī hadoñ meñ is tarah bahtī thī tū

be-ḳhudī meñ sab kināre toḌtī rahtī thī tū

lucknow vaale tire andāz ke dīvāne the

sham.a ke mānind thī tū sab tire parvāne the

tere alhaḌ-pan kī vo be-sāḳhta mastāna chaal

jaise aa jaa.e qalandar ko kisī mahfil meñ haal

jab kabhī lahreñ sharārat par tirī aa jaatī thiiñ

darmiyān-e-shahr bhī tab kashtiyāñ chal jaatī thiiñ

shahar se bāhar thī terī tez-raftārī fuzūñ

ghūmtī aur moḌtī rahtī thī apnī chaal tū

nīmā-e-shābān kī rātoñ meñ ārā.ish tirī

tairte bajroñ se raushan husn-o-zebā.ish tirī

raushnī se maañg meñ afshāñ bhare rahnā tirā

donoñ jānib zulf kā saaya kiye bahnā tirā

husn kā tere ujālā thā avadh kī shaam meñ

dilkashī terī thī saarī lucknow ke naam meñ

shahar kī saarī kasāfat yuuñ chhupā letī thī tū

zaḳhm-e-dil par reshmī āñchal uḌhā detī thī tū

oḌhnī āb-e-ravāñ kī pheñktī rahtī thī tū

raqs kartī girtī paḌtī bhāgtī chaltī thī tū

tere fitrī raqs ko zanjīr-e-pā kis ne kiyā

husn-e-be-parvā ko pāband-e-hayā kis ne kiyā

kyoñ zamāne ke sitam is tarah tū sahne lagī

āñsuoñ kī nahar ke saath kyoñ bahne lagī

mere bachpan ki meri pyari saheli gomti

tujh pe kya guzri hai ki tu yun simaT kar rah gai

wo teri maddham suron mein KHush-bayani kya hui

wo teri be-saKHta tarz-e-rawani kya hui

shoKHi-e-raftar par teri fida tha lucknow

har qadam par kah raha nam-e-KHuda tha lucknow

kab bhala apni hadon mein is tarah bahti thi tu

be-KHudi mein sab kinare toDti rahti thi tu

lucknow wale tere andaz ke diwane the

shama ke manind thi tu sab tere parwane the

tere alhaD-pan ki wo be-saKHta mastana chaal

jaise aa jae qalandar ko kisi mahfil mein haal

jab kabhi lahren shararat par teri aa jati thin

darmiyan-e-shahr bhi tab kashtiyan chal jati thin

shahar se bahar thi teri tez-raftari fuzun

ghumti aur moDti rahti thi apni chaal tu

nima-e-shaban ki raaton mein aaraish teri

tairte bajron se raushan husn-o-zebaish teri

raushni se mang mein afshan bhare rahna tera

donon jaanib zulf ka saya kiye bahna tera

husn ka tere ujala tha awadh ki sham mein

dilkashi teri thi sari lucknow ke nam mein

shahar ki sari kasafat yun chhupa leti thi tu

zaKHm-e-dil par reshmi aanchal uDha deti thi tu

oDhni aab-e-rawan ki phenkti rahti thi tu

raqs karti girti paDti bhagti chalti thi tu

tere fitri raqs ko zanjir-e-pa kis ne kiya

husn-e-be-parwa ko paband-e-haya kis ne kiya

kyon zamane ke sitam is tarah tu sahne lagi

aansuon ki nahar ke sath kyon bahne lagi