guDDe guDiya ka byah

jamīla shakīla kī thī ik sahelī

sahelī bhī ik umr kī saath khelī

bahut hī thā iḳhlās aur pyaar un meñ

huī thī na jhūToñ bhī takrār un meñ

thī yuuñ to har ik khel se un ko raġhbat

magar sab se baḌh kar thī guḌiyoñ kī chāhat

jamīla kī guḌiyā thī chīnī kī mūrat

shakīla kā guDDā bhī thā ḳhūbsūrat

shakīla ne sochā ki shādī rachāeñ

jamīla sahelī ko samdhan banā.eñ

shakīla baḌe chaav se chal ke aa.ī

vo guDDe kī mañgnī kā paiġhām laa.ī

ka.ī laḌkiyāñ aur bhī saath aa.iiñ

jamīla ke ghar aa ke bāteñ banā.īñ

idhar kī udhar kī huiiñ ḳhuub bāteñ

ye mañgnī kī bāteñ rahīñ chand rāteñ

ye baat aur vo baat aur kabhī haañ kabhī naañ

ka.ī din rahīñ b shakīla pareshāñ

par āḳhir vo aa hī ga.ī nek saa.at

na baaqī rahī koī jhagḌe kī sūrat

jamīla ne manzūr kar lī ye shādī

ḳhabar saare bachchoñ ko is kī sunā dī

ijāzat unhoñ ne baḌoñ se bhī le lī

phir achchhī sī tārīḳh shādī kī tai kī

qarīb aa.e shādī kī taqrīb ke din

to kaaTe ye din saare bachchoñ ne gin gin

vo shādī kī tārīḳh jis roz aa.ī

masarrat ne duniyā meñ naubat bajā.ī

shakīla ne guDDe ko dūlhā banāyā

use ek baḌhiyā sā joḌā pahnāyā

vo kurtā vo achkan vo pagḌī vo paTkā

vo resham kī shalvār vaslī kā juutā

vo munnā sā rūmāl moze Tasar ke

jhamaktī kalā us ke salme sitāre

jaḌāv añgūThī vo motī kī maalā

vo rañgīn jaama vo phūloñ kā sahrā

biThā us ko ghoḌe pe vo saath laa.ī

barāt us ne guDDe kī apnī sajā.ī

chale saath ban ban ke bachche barātī

chalī pārTī ek gaatī bajātī

taḌātaḌ vo tāshoñ kī bājoñ kī Teñ-Teñ

majīre kī Tan Tan nafīrī kī peñ-peñ

vo logoñ kā chalnā paTāḳhoñ kā chhuTnā

havā meñ anāroñ ke phūloñ kā luTnā

isī ThāTh se chal ke bārāt aa.ī

dulhan kī taraf se huī peshvā.ī

jamīla ne sab kā kyā ḳhair muqaddam

mile ho ke bāham vo sab shād-o-ḳhurram

jahāñ farsh ik chāñdnī kā bichhā thā

thī masnad na.ī gaav takiya nayā thā

vahāñ mehmānoñ ko locker biThāyā

diye paan aur sab ko sharbat pilāyā

bulā.e ga.e shahr se ek qaazī

dulhan aur dūlhā hue donoñ raazī

zarā der meñ ho ga.ī un kī shādī

sabhī ahl-e-mahfil ne dil se duā dī

chuvāre luTe phir baTī kuchh miThā.ī

miThā.ī ye sab ne maze le ke khaa.ī

hue shaad mehmān chhoTe baḌe kul

mubārak salāmat kā pas mach gayā ġhul

huā vaqt guḌiyā kī ruḳhsat kā jis dam

jamīla ke chehre pe thā ġham kā aalam

shakīla ne jhaT pālkī ik mañgā.ī

biThā us meñ guḌiyā ko ghar apne laa.ī

huī ḳhuub shohrat huā ḳhuub ḳharcha

rahā shahr meñ muddatoñ is kā charchā

ġharaz byaah guDDe kā guḌiyā kā jaisā

huā ye huā hogā 'nayyar' na aisā

jamila shakila ki thi ek saheli

saheli bhi ek umr ki sath kheli

bahut hi tha iKHlas aur pyar un mein

hui thi na jhuTon bhi takrar un mein

thi yun to har ek khel se un ko raghbat

magar sab se baDh kar thi guDiyon ki chahat

jamila ki guDiya thi chini ki murat

shakila ka guDDa bhi tha KHubsurat

shakila ne socha ki shadi rachaen

jamila saheli ko samdhan banaen

shakila baDe chaw se chal ke aai

wo guDDe ki mangni ka paigham lai

kai laDkiyan aur bhi sath aain

jamila ke ghar aa ke baaten banain

idhar ki udhar ki huin KHub baaten

ye mangni ki baaten rahin chand raaten

ye baat aur wo baat aur kabhi han kabhi nan

kai din rahin b shakila pareshan

par aaKHir wo aa hi gai nek saat

na baqi rahi koi jhagDe ki surat

jamila ne manzur kar li ye shadi

KHabar sare bachchon ko is ki suna di

ijazat unhon ne baDon se bhi le li

phir achchhi si tariKH shadi ki tai ki

qarib aae shadi ki taqrib ke din

to kaTe ye din sare bachchon ne gin gin

wo shadi ki tariKH jis roz aai

masarrat ne duniya mein naubat bajai

shakila ne guDDe ko dulha banaya

use ek baDhiya sa joDa pahnaya

wo kurta wo achkan wo pagDi wo paTka

wo resham ki shalwar wasli ka juta

wo munna sa rumal moze Tasar ke

jhamakti kala us ke salme sitare

jaDaw anguThi wo moti ki mala

wo rangin jama wo phulon ka sahra

biTha us ko ghoDe pe wo sath lai

baraat us ne guDDe ki apni sajai

chale sath ban ban ke bachche baraati

chali parTi ek gati bajati

taDataD wo tashon ki bajon ki Ten-Ten

majire ki Tan Tan nafiri ki pen-pen

wo logon ka chalna paTaKHon ka chhuTna

hawa mein anaron ke phulon ka luTna

isi ThaTh se chal ke baraat aai

dulhan ki taraf se hui peshwai

jamila ne sab ka kya KHair muqaddam

mile ho ke baham wo sab shad-o-KHurram

jahan farsh ek chandni ka bichha tha

thi masnad nai gaw takiya naya tha

wahan mehmanon ko locker biThaya

diye pan aur sab ko sharbat pilaya

bulae gae shahr se ek qazi

dulhan aur dulha hue donon raazi

zara der mein ho gai un ki shadi

sabhi ahl-e-mahfil ne dil se dua di

chuware luTe phir baTi kuchh miThai

miThai ye sab ne maze le ke khai

hue shad mehman chhoTe baDe kul

mubarak salamat ka pas mach gaya ghul

hua waqt guDiya ki ruKHsat ka jis dam

jamila ke chehre pe tha gham ka aalam

shakila ne jhaT palki ek mangai

biTha us mein guDiya ko ghar apne lai

hui KHub shohrat hua KHub KHarcha

raha shahr mein muddaton is ka charcha

gharaz byah guDDe ka guDiya ka jaisa

hua ye hua hoga 'nayyar' na aisa