guDiya ki shadi

mirī guḌiyā kisī din chāñd par shādī rachā.egī

zamīñ ke to sabhī guDDe nazar aate haiñ ab buDDhe

bahut hī ḳhūbsūrat naujavāñ haiñ chāñd ke guDDe

unhīñ meñ se kisī ke ghar mirī guḌiyā bhī jā.egī

mirī guḌiyā kisī din chāñd par shādī rachā.egī

farishte āsmānoñ se barātī ban ke ā.eñge

sitāre rāste meñ nuur kī chādar bichhā.eñge

ḳhushī se jhuum kar har huur shahnā.ī bajā.egī

mirī guḌiyā kisī din chāñd par shādī rachā.egī

hasīñ kirnoñ se raushan chāñdnī kī pālkī hogī

zamīñ se āsmāñ tak raushnī hī raushnī hogī

mirī guḌiyā jab apne ghar se ruḳhsat ho ke jā.egī

mirī guḌiyā kisī din chāñd par shādī rachā.egī

nazar aa.egī jab us ko mirī pyārī sī ye guḌiyā

balā.eñ par balā.eñ legī baḌh kar chāñd kī buḌhiyā

dulhan ko dekh kar dūlhe kī qismat jagmagā.egī

mirī guḌiyā kisī din chāñd par shādī rachā.egī

meri guDiya kisi din chand par shadi rachaegi

zamin ke to sabhi guDDe nazar aate hain ab buDDhe

bahut hi KHubsurat naujawan hain chand ke guDDe

unhin mein se kisi ke ghar meri guDiya bhi jaegi

meri guDiya kisi din chand par shadi rachaegi

farishte aasmanon se baraati ban ke aaenge

sitare raste mein nur ki chadar bichhaenge

KHushi se jhum kar har hur shahnai bajaegi

meri guDiya kisi din chand par shadi rachaegi

hasin kirnon se raushan chandni ki palki hogi

zamin se aasman tak raushni hi raushni hogi

meri guDiya jab apne ghar se ruKHsat ho ke jaegi

meri guDiya kisi din chand par shadi rachaegi

nazar aaegi jab us ko meri pyari si ye guDiya

balaen par balaen legi baDh kar chand ki buDhiya

dulhan ko dekh kar dulhe ki qismat jagmagaegi

meri guDiya kisi din chand par shadi rachaegi