gul-farosh

ye nāznīñ ki jise qāsid-e-bahār kaheñ

javāñ hasīna ki fitrat kā shāhkār kahīñ

payām-e-āmad-e-fasl-e-bahār detī hai

junūñ-nasīb diloñ kī duā.eñ letī hai

ise chaman ke har ik phuul se mohabbat hai

ise bahār kī ra.anā.iyoñ se ulfat hai

guloñ meñ phirtī hai yuuñ jaise tītarī koī

chaman kī sair kare yā hasīñ parī koī

jo phuul chunte hue naġhme gungunātī hai

ye shāyad apnī javānī ke giit gaatī hai

shabāb ne jo ise tamkanat sikhā dī hai

ġharīb hī sahī phūloñ kī shāhzādī hai

jahān vāloñ kā husn-e-sulūk dekhā hai

ise zamāne kī be-rahmiyoñ se shikva hai

guzar rahe haiñ shab-o-roz kitne bhārī se

shabāb kaaT rahī hai hazār ḳhvārī se

ḳhudī kā dars hai afsāna-e-hayāt is kā

javāb paidā karegī na kā.enāt is kā

ise zamāne kī nairañgiyoñ kā hosh nahīñ

mirī nazar meñ ye devī hai gul-farosh nahīñ

sitam-zarīfī-e-fitrat ko aaj sharmā.ūñ

jo haar gūñdhe haiñ aaj usī ko pahnā.ūñ

ye naznin ki jise qasid-e-bahaar kahen

jawan hasina ki fitrat ka shahkar kahin

payam-e-amad-e-fasl-e-bahaar deti hai

junun-nasib dilon ki duaen leti hai

ise chaman ke har ek phul se mohabbat hai

ise bahaar ki ranaiyon se ulfat hai

gulon mein phirti hai yun jaise titari koi

chaman ki sair kare ya hasin pari koi

jo phul chunte hue naghme gungunati hai

ye shayad apni jawani ke git gati hai

shabab ne jo ise tamkanat sikha di hai

gharib hi sahi phulon ki shahzadi hai

jahan walon ka husn-e-suluk dekha hai

ise zamane ki be-rahmiyon se shikwa hai

guzar rahe hain shab-o-roz kitne bhaari se

shabab kaT rahi hai hazar KHwari se

KHudi ka dars hai afsana-e-hayat is ka

jawab paida karegi na kaenat is ka

ise zamane ki nairangiyon ka hosh nahin

meri nazar mein ye dewi hai gul-farosh nahin

sitam-zarifi-e-fitrat ko aaj sharmaun

jo haar gundhe hain aaj usi ko pahnaun