گل نامہ

کھل کے ہنستا ہے مہکتا ہے بکھر جاتا ہے گل

اک ہی دن میں سو حوادث سے گزر جاتا ہے گل

تھال میں پوجا کے یا بالوں میں دوشیزہ کے

شاخ سے ہو کے جدا دیکھو کدھر جاتا ہے گل

رشک ہوتا ہے ہمیں اس کے مقدر پہ بہت

لے کے پیغام جو محبوب کے گھر جاتا ہے گل

گل بدن ہوگا کوئی یاد میں جس کی ہر دن

آ کے چپ چاپ کوئی قبر پہ دھر جاتا ہے گل

جو مسلتا ہے اسے بھی ہے معطر کرتا

دشمنوں سے بھی سلوک اچھا ہی کر جاتا ہے گل

یوں تو ہر رنگ کی پوشاک میں لگتا ہے بھلا

اوس کے موتیوں سے اور نکھر جاتا ہے گل

راز قدرت ہمیں سمجھایا ہے اک گل نے صداؔ

گل نئے کھلتے رہیں اس لئے جھر جاتا ہے گل