gul-nama

khil ke hañstā hai mahaktā hai bikhar jaatā hai gul

ik hī din meñ sau havādis se guzar jaatā hai gul

thaal meñ puujā ke yā bāloñ meñ doshīza ke

shāḳh se ho ke judā dekho kidhar jaatā hai gul

rashk hotā hai hameñ us ke muqaddar pe bahut

le ke paiġhām jo mahbūb ke ghar jaatā hai gul

gul-badan hogā koī yaad meñ jis kī har din

aa ke chup-chāp koī qabr pe dhar jaatā hai gul

jo masaltā hai use bhī hai mo'attar kartā

dushmanoñ se bhī sulūk achchhā hī kar jaatā hai gul

yuuñ to har rang kī poshāk meñ lagtā hai bhalā

os ke motiyoñ se aur nikhar jaatā hai gul

rāz-e-qudrat hameñ samjhāyā hai ik gul ne 'sadā'

gul na.e khilte raheñ is liye jhar jaatā hai gul

khil ke hansta hai mahakta hai bikhar jata hai gul

ek hi din mein sau hawadis se guzar jata hai gul

thaal mein puja ke ya baalon mein doshiza ke

shaKH se ho ke juda dekho kidhar jata hai gul

rashk hota hai hamein us ke muqaddar pe bahut

le ke paigham jo mahbub ke ghar jata hai gul

gul-badan hoga koi yaad mein jis ki har din

aa ke chup-chap koi qabr pe dhar jata hai gul

jo masalta hai use bhi hai mo'attar karta

dushmanon se bhi suluk achchha hi kar jata hai gul

yun to har rang ki poshak mein lagta hai bhala

os ke motiyon se aur nikhar jata hai gul

raaz-e-qudrat hamein samjhaya hai ek gul ne 'sada'

gul nae khilte rahen is liye jhar jata hai gul