gulab-ba-kaf

bahār kī ye dil-āvez shaam

jis kī taraf

qadam uThā.e haiñ maiñ ne

ki us se haath milā.ūñ

aur ik shagufta shanāsā.ī kī binā rakkhūñ

phir apnī ḳhāna-badoshī kī mushtarak lai par

use gulāb-ba-kaf ḳhema-e-junūñ tak lā.ūñ

kuchh us kī ḳhair ḳhabar pūchhūñ

aur kuchh apnī kahūñ

kahūñ ki kitne hī patjhaḌ ke mausam aa.e ga.e

magar in āñkhoñ kī sahr-ul-bayāniyāñ na ga.iiñ

kahūñ ki garche anāsir ne tohmateñ bāñdhīñ

junūñ zadoñ kī magar saḳht-jāniyāñ na ga.iiñ

kahūñ ki ek haiñ andeshe sab mire tere

kahūñ alag nahīñ jiine ke Dhab mire tere

kahūñ ki ek se haiñ roz-o-shab mire tere

kahūñ ki milte haiñ nām-o-nasab mire tere

kahūñ azal se junūñ kārobār apnā hai

hazār jabr ho kuchh iḳhtiyār apnā hai

bahaar ki ye dil-awez sham

jis ki taraf

qadam uThae hain main ne

ki us se hath milaun

aur ek shagufta shanasai ki bina rakkhun

phir apni KHana-badoshi ki mushtarak lai par

use gulab-ba-kaf KHema-e-junun tak laun

kuchh us ki KHair KHabar puchhun

aur kuchh apni kahun

kahun ki kitne hi patjhaD ke mausam aae gae

magar in aankhon ki sahr-ul-bayaniyan na gain

kahun ki garche anasir ne tohmaten bandhin

junun zadon ki magar saKHt-jaaniyan na gain

kahun ki ek hain andeshe sab mere tere

kahun alag nahin jine ke Dhab mere tere

kahun ki ek se hain roz-o-shab mere tere

kahun ki milte hain nam-o-nasab mere tere

kahun azal se junun karobar apna hai

hazar jabr ho kuchh iKHtiyar apna hai