gulha-e-aqidat

yaum-e-āzādī ne yuuñ chhiḌkā fazāoñ meñ gulāl

gulsitāñ se bhīnī bhīnī ḳhushbueñ aane lagīñ

titliyāñ apne paroñ par pā ke qaabū har taraf

sehn-e-gulshan kī ravish par raqs farmāne lagīñ

qumriyāñ mīThe suroñ ke saaz le kar aa ga.iiñ

bulbuleñ mil-jul ke āzādī ke gun gaane lagīñ

gul se apnī nisbat-e-derīna kī khā kar qasam

ahl-e-dil ko ishq ke andāz samjhāne lagīñ

sub.h-dam bād-e-sabā kī shoḳhiyāñ kaam aa ga.iiñ

lāla-o-gul ko baġhal-gīrī kā mauqa mil gayā

dekh kar is dostī ke pur-fazā māhaul ko

saarī kaliyāñ hañs paḌīñ saarā gulistāñ khil gayā

lekin is din ke liye ai ham-nashīno dosto

kaisī kaisī be-bahā qurbāniyāñ denā paḌīñ

ḳhūn-e-dil denā paḌā ḳhūn-e-jigar denā paḌā

apne ḳhvāboñ kī hasīñ parchhā.iyāñ denā paḌīñ

aarzū meñ terī ai gul-posh shahzādī na pūchh

kaise ālam-tāb sardāroñ ke sar jaate rahe

sarzamīn-e-hind ko jannat banāne ke liye

kaise kaise dast-o-bāzū ke shajar jaate rahe

ḳhair ab ham mutma.in yuuñ haiñ ki jān-e-ārzū

ham ne kuchh kho bhī diyā hai aur kuchh paayā bhī hai

kaise kaise aql ko de kar dilāse jān-e-jāñ

ruuh ko taskīn dī hai dil ko samjhāyā bhī hai

ab yahī koshish hai dil se ai mirī arz-e-vatan

terī peshānī pe ab koī shikan aane na paa.e

tū ne pahnī hai jo āzādī kī maalā shauq se

umr-bhar koī kalī bhī is kī murjhāne na paa.e

apne gulhā-e-aqīdat pesh kartī huuñ tujhe

muḳhtasar ye hai mohabbat pesh kartī huuñ tujhe

yaum-e-azadi ne yun chhiDka fazaon mein gulal

gulsitan se bhini bhini KHushbuen aane lagin

titliyan apne paron par pa ke qabu har taraf

sehn-e-gulshan ki rawish par raqs farmane lagin

qumriyan miThe suron ke saz le kar aa gain

bulbulen mil-jul ke aazadi ke gun gane lagin

gul se apni nisbat-e-derina ki kha kar qasam

ahl-e-dil ko ishq ke andaz samjhane lagin

subh-dam baad-e-saba ki shoKHiyan kaam aa gain

lala-o-gul ko baghal-giri ka mauqa mil gaya

dekh kar is dosti ke pur-faza mahaul ko

sari kaliyan hans paDin sara gulistan khil gaya

lekin is din ke liye ai ham-nashino dosto

kaisi kaisi be-baha qurbaniyan dena paDin

KHun-e-dil dena paDa KHun-e-jigar dena paDa

apne KHwabon ki hasin parchhaiyan dena paDin

aarzu mein teri ai gul-posh shahzadi na puchh

kaise aalam-tab sardaron ke sar jate rahe

sarzamin-e-hind ko jannat banane ke liye

kaise kaise dast-o-bazu ke shajar jate rahe

KHair ab hum mutmain yun hain ki jaan-e-arzu

hum ne kuchh kho bhi diya hai aur kuchh paya bhi hai

kaise kaise aql ko de kar dilase jaan-e-jaan

ruh ko taskin di hai dil ko samjhaya bhi hai

ab yahi koshish hai dil se ai meri arz-e-watan

teri peshani pe ab koi shikan aane na pae

tu ne pahni hai jo aazadi ki mala shauq se

umr-bhar koi kali bhi is ki murjhane na pae

apne gulha-e-aqidat pesh karti hun tujhe

muKHtasar ye hai mohabbat pesh karti hun tujhe