gum-shuda KHayal ka tazkira

bhaḌak bhaḌak ke sadāoñ ne rah dikhā.ī mujhe

hazār sang-e-safar ham-safar bane bigḌe

ye aarzū hai ki ḳhvāhish kā koī phal na gire

musāfirat ke samundar meñ sab ko tanhā karūñ

vo mujh se chhuptā phire aur maiñ us ko dekhā karūñ

numā.ish-e-ġham-e-sahrā meñ us pe saayā karūñ

ba-rang-e-ḳhvāb ruke pāniyoñ ko chakkhā karūñ

parā.e bāġhoñ pe abr-e-ravāñ kā saaya rahe

khulā ho sahn havā ḳhvāhishoñ kī baat sune

udhaḌtā rang mahakte guloñ meñ ḳhuun bhare

jise maiñ DhūñD rahā huuñ use koī na mile

ye ek lamha Thahar jaa.e ḳhatm raat na ho

safar se lauTūñ to koī bhī mere saat na ho

bhaDak bhaDak ke sadaon ne rah dikhai mujhe

hazar sang-e-safar ham-safar bane bigDe

ye aarzu hai ki KHwahish ka koi phal na gire

musafirat ke samundar mein sab ko tanha karun

wo mujh se chhupta phire aur main us ko dekha karun

numaish-e-gham-e-sahra mein us pe saya karun

ba-rang-e-KHwab ruke paniyon ko chakkha karun

parae baghon pe abr-e-rawan ka saya rahe

khula ho sahn hawa KHwahishon ki baat sune

udhaDta rang mahakte gulon mein KHun bhare

jise main DhunD raha hun use koi na mile

ye ek lamha Thahar jae KHatm raat na ho

safar se lauTun to koi bhi mere sat na ho