gum-shuda manzilen

hazār baar yahī baat dil meñ uThtī hai

jo ho rahā hai ye pahle bhī ho chukā hai kabhī

ye band āñkhoñ se kyā āsmāñ sā dikhtā hai

bhalā ye raushnī sī mujh meñ kyoñ utartī hai

kahīñ pahuñch ke ka.ī baar ye bhī lagtā hai

ki jaise pahle bhī aa.ī huuñ is jagah pe kabhī

tum us jagah the khaḌe haañ vahīñ zarā aage

idhar maiñ baiThī thī chup-chāp ek patthar par

abhī jo baat kahī hai kahī thī tab bhī yahī

kabhī kabhī to mire saath ye bhī hotā hai

ki koī vāqi.a hone se pahle dikhtā hai

jahāñ maiñ pahle kisī taur bhī ga.ī hī nahīñ

vahāñ bhī pahuñchī huuñ aksar maiñ apne ḳhvāboñ meñ

aur itnī baar ki har chiiz us Thikāne kī

hai merī yaad meñ shāmil kuchh is tarah jaise

ki merā un se ta'alluq koī purānā ho

shu.ūr aur mire lā-shu.ūr kā ye safar

kahāñ kahāñ se na jaane abhī ye guzregā

na jaane kaun sī manzil pe jā ke Thahregā

agar chhalāvā hai koī to kyoñ chhalāvā hai

agar hai rābta to kis ke saath hai āḳhir

hazār baar yahī baat dil meñ uThtī hai

hazar bar yahi baat dil mein uThti hai

jo ho raha hai ye pahle bhi ho chuka hai kabhi

ye band aankhon se kya aasman sa dikhta hai

bhala ye raushni si mujh mein kyon utarti hai

kahin pahunch ke kai bar ye bhi lagta hai

ki jaise pahle bhi aai hun is jagah pe kabhi

tum us jagah the khaDe han wahin zara aage

idhar main baiThi thi chup-chap ek patthar par

abhi jo baat kahi hai kahi thi tab bhi yahi

kabhi kabhi to mere sath ye bhi hota hai

ki koi waqia hone se pahle dikhta hai

jahan main pahle kisi taur bhi gai hi nahin

wahan bhi pahunchi hun aksar main apne KHwabon mein

aur itni bar ki har chiz us Thikane ki

hai meri yaad mein shamil kuchh is tarah jaise

ki mera un se ta'alluq koi purana ho

shuur aur mere la-shuur ka ye safar

kahan kahan se na jaane abhi ye guzrega

na jaane kaun si manzil pe ja ke Thahrega

agar chhalawa hai koi to kyon chhalawa hai

agar hai rabta to kis ke sath hai aaKHir

hazar bar yahi baat dil mein uThti hai