guman ka mumkin- jo tu hai main hun

karīm sūraj

jo ThanDe patthar ko apnī golā.ī

de rahā hai

jo apnī hamvārī de rahā hai

(vo ThanDā patthar jo mere mānind

bhūre sabzoñ meñ

duur reg o havā kī yādoñ meñ loTtā hai)

jo bahte paanī ko apnī dariyā-dilī kī

sarshārī de rahā hai

vahī mujhe jāntā nahīñ

magar mujhī ko ye vahm shāyad

ki āp-apnā subūt apnā javāb huuñ maiñ!

mujhe vo pahchāntā nahīñ hai

ki merī dhīmī sadā

zamāne kī jhiil ke dūsre kināre

se aa rahī hai

ye jhiil vo hai ki jis ke uupar

hazāroñ insāñ

ufuq ke mutavāzī chal rahe haiñ

ufuq ke mutavāzī chalne vāloñ ko paar laatī haiñ

vaqt lahreñ

jinheñ tamannā, magar, samāvī ḳhirām kī ho

inhī ko pātāl zamzamoñ kī sadā sunātī haiñ

vaqt lahreñ

unheñ Dubotī haiñ vaqt lahreñ!

tamām mallāh us sadā se sadā hirāsāñ, sadā gurezāñ

ki jhiil meñ ik umuud kā chor chhup ke baiThā hai

us ke gesū ufuq kī chhat se laTak rahe haiñ

pukārtā hai: ''ab aao, aao!

azal se maiñ muntazir tumhārā

maiñ gumbadoñ ke tamām rāzoñ ko jāntā huuñ

daraḳht mīnār burj ziine mire hī sāthī

mire hī mutavāzī chal rahe haiñ

maiñ har havā.ī-jahāz kā āḳhirī baserā

samundaroñ par jahāz-rānoñ kā maiñ kinārā

ab aao, aao!

tumhāre jaise ka.ī fasānoñ ko maiñ ne un ke

abad ke āġhosh meñ utārā''

tamām mallāh is kī āvāz se gurezāñ

ufuq kī shāh-rāh-e-mubtazil par tamām sahme hue ḳhirāmāñ

magar samāvī ḳhirām vaale

jo past o baalā ke āstāñ par jame hue haiñ

umuud ke is tanāb hī se utar rahe haiñ

isī ko thāme hue bulandī pe chaḌh rahe haiñ!

isī tarah maiñ bhī saath in ke utar gayā huuñ

aur aise sāhil par aa lagā huuñ

jahāñ ḳhudā ke nishān-e-pā ne panāh lī hai

jahāñ ḳhudā kī za.iif āñkheñ

abhī salāmat bachī huī haiñ,

yahī samāvī ḳhirām merā nasīb niklā

yahī samāvī ḳhirām jo merī aarzū thā

magar na jaane

vo rāsta kyuuñ chunā thā maiñ ne

ki jis pe ḳhud se visāl tak kā gumāñ nahīñ hai?

vo rāsta kyuuñ chunā thā maiñ ne

vo ruk gayā hai diloñ ke ib.hām ke kināre?

vahī kinārā ki jis ke aage gumāñ kā mumkin

jo tū hai maiñ huuñ!

magar ye sach hai

maiñ tujh ko paane kī (ḳhud ko paane kii) aarzū meñ nikal paḌā thā

us ek mumkin kī justujū meñ

jo tū hai maiñ huuñ

maiñ aise chehre ko DhūñDhtā thā

jo tū hai maiñ huuñ

maiñ aisī tasvīr ke ta.āqub meñ ghūmtā thā

jo tū hai maiñ huuñ!

maiñ is ta.āqub meñ

kitne āġhāz gin chukā huuñ

(meñ us se Dartā huuñ jo ye kahtā

hai mujh ko ab koī Dar nahīñ hai)

maiñ is ta.āqub meñ kitnī galiyoñ se,

kitne chaukoñ se,

kitne gūñge musass se, guzar gayā huuñ

maiñ is ta.āqub meñ kitne bāġhoñ se,

kitnī andhī sharāb rātoñ se,

kitnī bāñhoñ se,

kitnī chāhat ke kitne bifre samundaroñ se

guzar gayā huuñ

maiñ kitnī hosh o amal kī sham.oñ se,

kitne īmāñ ke gumbadoñ se

guzar gayā huuñ

maiñ is ta.āqub meñ kitne āġhāz kitne anjām gin chukā huuñ

ab is ta.āqub meñ koī dar hai

na koī aatā huā zamāna

har ek manzil jo rah ga.ī hai

faqat guzartā huā fasāna

tamām raste, tamām būjhe savāl, be-vazn ho chuke haiñ

javāb, tārīḳh ruup dhāre

bas apnī takrār kar rahe haiñ

javāb ham haiñ javāb ham haiñ

hameñ yaqīñ hai javāb ham haiñ

yaqīñ ko kaise yaqīñ se dohrā rahe haiñ kaise!

magar vo sab aap apnī zid haiñ

tamām, jaise gumāñ kā mumkin

jo tū hai maiñ huuñ!

tamām kunde (tū jāntī hai)

jo sat.h-e-dariyā pe saath dariyā ke tairte haiñ

ye jānte haiñ ye hādse

ki jis se un ko,

(kisī ko) koī mafar nahīñ!

tamām kunde jo sat.h-e-dariyā pe tairte haiñ,

nahañg banñā ye un kī taqdīr meñ nahīñ hai

(nahañg kī ibtidā meñ hai ik nahañg shāmil

nahañg kā dil nahañg kā dil!)

na un kī taqdīr meñ hai phir se daraḳht banñā

(daraḳht kī ibtidā meñ hai ik daraḳht shāmil

daraḳht kā dil daraḳht kā dil!)

tamām kunde ke sāmne band vāpsī kī

tamām rāheñ

vo sat.h-e-dariyā pe jabr-e-dariyā se tairte haiñ

ab un kā anjām ghaaT haiñ jo

sadā se āġhosh vā kiye haiñ

ab un kā anjām vo safīne

abhī nahīñ jo safīna-gar ke qayās meñ bhī

ab un kā anjām

aise aurāq jin pe harf-e-siyah chhapegā

ab un kā anjām vo kitābeñ

ki jin ke qaarī nahīñ, na hoñge

ab un kā anjām aise sūrat-garoñ ke parde

abhī nahīñ jin ke koī chehre

ki un pe aañsū ke rañg utreñ,

aur in meñ ā.inda

un ke ruuyā ke naqsh bhar de

ġharīb kundoñ ke sāmne band vāpsī kī

tamām rāheñ

baqā-e-mauhūm ke jo raste khule haiñ ab tak

hai un ke aage gumāñ kā mumkin

gumāñ kā mumkin jo tū hai maiñ huuñ,

jo tū hai meñ huuñ

karim suraj

jo ThanDe patthar ko apni golai

de raha hai

jo apni hamwari de raha hai

(wo ThanDa patthar jo mere manind

bhure sabzon mein

dur reg o hawa ki yaadon mein loTta hai)

jo bahte pani ko apni dariya-dili ki

sarshaari de raha hai

wahi mujhe jaanta nahin

magar mujhi ko ye wahm shayad

ki aap-apna subut apna jawab hun main!

mujhe wo pahchanta nahin hai

ki meri dhimi sada

zamane ki jhil ke dusre kinare

se aa rahi hai

ye jhil wo hai ki jis ke upar

hazaron insan

ufuq ke mutawazi chal rahe hain

ufuq ke mutawazi chalne walon ko par lati hain

waqt lahren

jinhen tamanna, magar, samawi KHiram ki ho

inhi ko patal zamzamon ki sada sunati hain

waqt lahren

unhen Duboti hain waqt lahren!

tamam mallah us sada se sada hirasan, sada gurezan

ki jhil mein ek umud ka chor chhup ke baiTha hai

us ke gesu ufuq ki chhat se laTak rahe hain

pukarta hai: ab aao, aao!

azal se main muntazir tumhaara

main gumbadon ke tamam raazon ko jaanta hun

daraKHt minar burj zine mere hi sathi

mere hi mutawazi chal rahe hain

main har hawai-jahaz ka aaKHiri basera

samundaron par jahaz-ranon ka main kinara

ab aao, aao!

tumhaare jaise kai fasanon ko main ne un ke

abad ke aaghosh mein utara

tamam mallah is ki aawaz se gurezan

ufuq ki shah-rah-e-mubtazil par tamam sahme hue KHiraman

magar samawi KHiram wale

jo past o baala ke aastan par jame hue hain

umud ke is tanab hi se utar rahe hain

isi ko thame hue bulandi pe chaDh rahe hain!

isi tarah main bhi sath in ke utar gaya hun

aur aise sahil par aa laga hun

jahan KHuda ke nishan-e-pa ne panah li hai

jahan KHuda ki zaif aankhen

abhi salamat bachi hui hain,

yahi samawi KHiram mera nasib nikla

yahi samawi KHiram jo meri aarzu tha

magar na jaane

wo rasta kyun chuna tha main ne

ki jis pe KHud se visal tak ka guman nahin hai?

wo rasta kyun chuna tha main ne

wo ruk gaya hai dilon ke ibham ke kinare?

wahi kinara ki jis ke aage guman ka mumkin

jo tu hai main hun!

magar ye sach hai

main tujh ko pane ki (KHud ko pane ki) aarzu mein nikal paDa tha

us ek mumkin ki justuju mein

jo tu hai main hun

main aise chehre ko DhunDhta tha

jo tu hai main hun

main aisi taswir ke taaqub mein ghumta tha

jo tu hai main hun!

main is taaqub mein

kitne aaghaz gin chuka hun

(men us se Darta hun jo ye kahta

hai mujh ko ab koi Dar nahin hai)

main is taaqub mein kitni galiyon se,

kitne chaukon se,

kitne gunge musass se, guzar gaya hun

main is taaqub mein kitne baghon se,

kitni andhi sharab raaton se,

kitni banhon se,

kitni chahat ke kitne bifre samundaron se

guzar gaya hun

main kitni hosh o amal ki shamon se,

kitne iman ke gumbadon se

guzar gaya hun

main is taaqub mein kitne aaghaz kitne anjam gin chuka hun

ab is taaqub mein koi dar hai

na koi aata hua zamana

har ek manzil jo rah gai hai

faqat guzarta hua fasana

tamam raste, tamam bujhe sawal, be-wazn ho chuke hain

jawab, tariKH rup dhaare

bas apni takrar kar rahe hain

jawab hum hain jawab hum hain

hamein yaqin hai jawab hum hain

yaqin ko kaise yaqin se dohra rahe hain kaise!

magar wo sab aap apni zid hain

tamam, jaise guman ka mumkin

jo tu hai main hun!

tamam kunde (tu jaanti hai)

jo sath-e-dariya pe sath dariya ke tairte hain

ye jaante hain ye hadse

ki jis se un ko,

(kisi ko) koi mafar nahin!

tamam kunde jo sath-e-dariya pe tairte hain,

nahang banna ye un ki taqdir mein nahin hai

(nahang ki ibtida mein hai ek nahang shamil

nahang ka dil nahang ka dil!)

na un ki taqdir mein hai phir se daraKHt banna

(daraKHt ki ibtida mein hai ek daraKHt shamil

daraKHt ka dil daraKHt ka dil!)

tamam kunde ke samne band wapsi ki

tamam rahen

wo sath-e-dariya pe jabr-e-dariya se tairte hain

ab un ka anjam ghaT hain jo

sada se aaghosh wa kiye hain

ab un ka anjam wo safine

abhi nahin jo safina-gar ke qayas mein bhi

ab un ka anjam

aise auraq jin pe harf-e-siyah chhapega

ab un ka anjam wo kitaben

ki jin ke qari nahin, na honge

ab un ka anjam aise surat-garon ke parde

abhi nahin jin ke koi chehre

ki un pe aansu ke rang utren,

aur in mein aainda

un ke ruya ke naqsh bhar de

gharib kundon ke samne band wapsi ki

tamam rahen

baqa-e-mauhum ke jo raste khule hain ab tak

hai un ke aage guman ka mumkin

guman ka mumkin jo tu hai main hun,

jo tu hai mein hun