gurez-pa

dhīre dhīre gir rahī thiiñ naḳhl-e-shab se chāñdnī kī pattiyāñ

bahte bahte abr kā TukḌā kahīñ se aa gayā thā darmiyāñ

milte milte rah ga.ī thiiñ maḳhmalīñ sabze pe do parchhā.iyāñ

jis tarah sapne ke jhūle se koī andhe kueñ meñ jā gire

nā-gahāñ kajlā ga.e the sharmagīñ āñkhoñ ke nūrānī diye

jis tarah shor-e-jaras se koī vāmāñda musāfir chauñk uThe

yak-ba-yak ghabrā ke vo niklī thī mere bāzuoñ kī qaid se

ab sulagte rah ga.e the, chhin gayā thā jaam bhī

aur merī bebasī par hañs paḌī thī chāñdnī

aaj tak ehsās kī chilman se uljhā hai ye mub.ham sā savāl

us ne āḳhir kyuuñ bunā thā bahkī nazroñ se hasīñ chāhat kā jaal

dhire dhire gir rahi thin naKHl-e-shab se chandni ki pattiyan

bahte bahte abr ka TukDa kahin se aa gaya tha darmiyan

milte milte rah gai thin maKHmalin sabze pe do parchhaiyan

jis tarah sapne ke jhule se koi andhe kuen mein ja gire

na-gahan kajla gae the sharmagin aankhon ke nurani diye

jis tarah shor-e-jaras se koi wamanda musafir chaunk uThe

yak-ba-yak ghabra ke wo nikli thi mere bazuon ki qaid se

ab sulagte rah gae the, chhin gaya tha jam bhi

aur meri bebasi par hans paDi thi chandni

aaj tak ehsas ki chilman se uljha hai ye mubham sa sawal

us ne aaKHir kyun buna tha bahki nazron se hasin chahat ka jal