gurezan

tumhāre saath chalne kā

mujhe jab hausla thā

tum kahāñ thiiñ

ḳhvāb ke madfan meñ

raushan

sham.a pā-basta

yahāñ se duur kā

afsurda nā-bīnā musāfir

jab bhī guzregā

vo e.ajāz-e-basārat se magar mahrūm guzregā

pukāregā kisī ham-dam ko jab

to guuñj ke afsūñ meñ

us kī garmī-e-raftār DhūñDegā

use jab lazzat-e-qurb-e-gurezāñ kī

purānī yaad aa.egī

vo jal jā.egā pal-bhar meñ

tumhārī sūrat-e-gul ke tasavvur se

agar tum sochtī ho māvarā-e-roz-o-shab ho

vo bhī shāyad roz-o-shab se māvarā hogā

maiñ nā-bīnā musāfir huuñ na sāhil par tumhārā ajnabī Thahrā

mulāqātoñ ke banjar silsiloñ

ke paar kyā hogā

salāsil ke tasalsul meñ

mirī āvāz ke chalte hue

gulshan kā kyā hogā

tumhaare sath chalne ka

mujhe jab hausla tha

tum kahan thin

KHwab ke madfan mein

raushan

shama pa-basta

yahan se dur ka

afsurda na-bina musafir

jab bhi guzrega

wo eajaz-e-basarat se magar mahrum guzrega

pukarega kisi ham-dam ko jab

to gunj ke afsun mein

us ki garmi-e-raftar DhunDega

use jab lazzat-e-qurb-e-gurezan ki

purani yaad aaegi

wo jal jaega pal-bhar mein

tumhaari surat-e-gul ke tasawwur se

agar tum sochti ho mawara-e-roz-o-shab ho

wo bhi shayad roz-o-shab se mawara hoga

main na-bina musafir hun na sahil par tumhaara ajnabi Thahra

mulaqaton ke banjar silsilon

ke par kya hoga

salasil ke tasalsul mein

meri aawaz ke chalte hue

gulshan ka kya hoga