gungi aurat

kyuuñ hairat se taktī hai ek ik chehre ko

kyā tujh ko shikva hai terī goyā.ī kī tāqat

chhīn ke qudarat ne be-insāfī kī hai?

kyā tujh ko ehsās hai tere paas agar guftār kī ne.amat hotī

to is chāroñ jānib phailī hathiyāroñ kī duniyā

siina dahlā dene vaale tayyāroñ kī insāñ-kush āvāzeñ

āvāzeñ jin meñ insāñ kī ruuh shabāna roz dabī jaatī hai

mahshar-ḳhez āvāzeñ kal-purzoñ kī jin se nafsī-nafsī kā aalam paidā ho kar

din par din ifrīt kī sūrat meñ baḌhtā jaatā hai

in āvāzoñ kī haibat-nākī par vāvailā kartī

tū āvāz uThātī us fāshī aur ta.assub phailāne vaale unsur ko baḌhtā pā kar

jo hubb-ul-vatanī ke naam pe insāñ-kush hotā jaatā hai

tū un rujhānāt kī ḳhuub mazammat kartī

un se laḌtī jo is duniyā ko pīchhe le jaane meñ koshāñ haiñ

'maz.hab aur tahzīb'

'saqāfat' aur 'taraqqī' kah kar raj.at-parvar ho jaate haiñ

le maiñ tujh ko apnī goyā.ī detā huuñ!

ye mere kaam nahīñ aa.ī kuchh

maiñ aisā buzdil huuñ jo har be-insāfī ko chupke chupke sahtā hai

jis ne 'maqtal' aur 'qātil' donoñ dekhe haiñ

lekin dānā.ī kah kar

apnī goyā.ī ko gūñgā kar rakhā hai!

kyun hairat se takti hai ek ek chehre ko

kya tujh ko shikwa hai teri goyai ki taqat

chhin ke qudarat ne be-insafi ki hai?

kya tujh ko ehsas hai tere pas agar guftar ki neamat hoti

to is chaaron jaanib phaili hathiyaron ki duniya

sina dahla dene wale tayyaron ki insan-kush aawazen

aawazen jin mein insan ki ruh shabana roz dabi jati hai

mahshar-KHez aawazen kal-purzon ki jin se nafsi-nafsi ka aalam paida ho kar

din par din ifrit ki surat mein baDhta jata hai

in aawazon ki haibat-naki par wawaila karti

tu aawaz uThati us fashi aur tassub phailane wale unsur ko baDhta pa kar

jo hubb-ul-watani ke nam pe insan-kush hota jata hai

tu un rujhanat ki KHub mazammat karti

un se laDti jo is duniya ko pichhe le jaane mein koshan hain

'mazhab aur tahzib'

'saqafat' aur 'taraqqi' kah kar rajat-parwar ho jate hain

le main tujh ko apni goyai deta hun!

ye mere kaam nahin aai kuchh

main aisa buzdil hun jo har be-insafi ko chupke chupke sahta hai

jis ne 'maqtal' aur 'qatil' donon dekhe hain

lekin danai kah kar

apni goyai ko gunga kar rakha hai!