حادثہ تو یہ بھی ہے

حادثہ تو یہ بھی ہے

ایسی چاند راتوں میں

دل لگی کی باتوں میں

چند لاابالی سے

جن میں ایک میں بھی ہوں

اور ایک تم بھی ہو

کچھ نہ سوچنے والے

آگہی کے ساحل سے

خوف کے سمندر تک

سوچ کے تھپیڑوں سے

ڈولنے بھی لگتے ہیں

یاس کے ترازو میں

ہاتھ کی لکیروں کو

تولنے بھی لگتے ہیں

حادثہ تو یہ بھی ہے

غم یہ ہے کہ جیون بھر

سوگوار لمحوں میں

جن اجاڑ راہوں پر

عمر کٹ گئی جن کی

چاندنی نے وہ راہیں

جس گھڑی منور کیں

روشنی کی خواہش میں

روز جاگنے والے

ایسی چاند راتوں کو

دیکھ بھی نہیں پائے

حادثہ تو یہ بھی ہے