حادثہ

اونچے پختہ مکان ہیں

مکانوں کے نام ہیں

انسان مگر گمنام ہیں

شہروں کی یہی پہچان ہے

زندگی ایک کہرام جیسے

جینا دشوار موت آسان ہے

شہروں کی یہی پہچان ہے

بھاگ دوڑ ہے

آہ و فغاں ہے

جینا عذاب ہے

آدمی سے آدمی انجان ہے

شہروں کی یہی پہچان ہے

پڑوسی کی موت پر

کوئی آنسو نہیں بہاتا

دو چار قدم

کوئی کاندھا نہیں دے پاتا

آخری آرام گاہ تک

کوئی ساتھ نہیں چل پاتا

موتیں ہوتی ہیں حادثوں سے

حادثوں کی موتوں میں

کبھی ایسا بھی ہوتا ہے

جنہیں دفنانا تھا وہ جلائے جاتے ہیں

جنہیں جلانا تھا وہ دفنائے جاتے ہیں

اور کچھ بد قسمت ایسے بھی ہوتے ہیں

جو کفن سے بھی محروم رہ جاتے ہیں