hadsat

zindagī hādsāt lagtī hai

kitnī chhoTī sī baat lagtī hai

tang sī kā.enāt lagtī hai

muḳhtasar jab hayāt lagtī hai

qaid-e-ġham aur bandish-e-hastī

qaid meñ guzrī raat lagtī hai

hasratoñ ke hujūm meñ aksar

zindagī mumkināt lagtī hai

vo bhī aksar udaas hote haiñ

har ḳhushī jin ke saath lagtī hai

ashk-bārī na pūchhiye ham se

aañkh sāvan kī raat lagtī hai

luuT letā hai ġham ḳhushī dil kī

mushkiloñ se jo haath lagtī hai

mehrbāñ hoñge vo kabhī mujh par

muñh se niklī sī baat lagtī hai

zindagī aur zindagī ke ġham

ik luTī sī barāt lagtī hai

zindagī muḳhtasar hai to kitnī

ek bhūlī sī baat lagtī hai

nā-murādī sī nā-murādī hai

zindagī khaa.ī maat lagtī hai

zaḳhm siine meñ chhoḌ jaatī hai

jo hañsī iltifāt lagtī hai

maut ko muskurāte dekhā hai

thartharā.ī hayāt lagtī hai

kashmakash zindagī kī ai 'ashraf'

bejā sā iltifāt lagtī hai

zindagi hadsat lagti hai

kitni chhoTi si baat lagti hai

tang si kaenat lagti hai

muKHtasar jab hayat lagti hai

qaid-e-gham aur bandish-e-hasti

qaid mein guzri raat lagti hai

hasraton ke hujum mein aksar

zindagi mumkinat lagti hai

wo bhi aksar udas hote hain

har KHushi jin ke sath lagti hai

ashk-bari na puchhiye hum se

aankh sawan ki raat lagti hai

luT leta hai gham KHushi dil ki

mushkilon se jo hath lagti hai

mehrban honge wo kabhi mujh par

munh se nikli si baat lagti hai

zindagi aur zindagi ke gham

ek luTi si baraat lagti hai

zindagi muKHtasar hai to kitni

ek bhuli si baat lagti hai

na-muradi si na-muradi hai

zindagi khai mat lagti hai

zaKHm sine mein chhoD jati hai

jo hansi iltifat lagti hai

maut ko muskuraate dekha hai

thartharai hayat lagti hai

kashmakash zindagi ki ai 'ashraf'

beja sa iltifat lagti hai