haji bhai pani wala

donoñ mashkīze labā-lab

ek chumbak kī tarah

apnī jānib khīñchte rahte use

fīl-bandī qahr thī

mard gāhak masḳharī karte hue Darte

zarā mohtāt rahte

jhurjhurī kā svāñg bharte

aurteñ maġhmūm āñkhoñ meñ

taras kāḌhe hue

apne bachchoñ par baras paḌtīñ

agar vo bad-lihāz

bholpan se pūchh lete

kyuuñ nahīñ

us ke falānoñ kī tarah

un ke falāne kyuuñ nahīñ

vo ḳhudā.ī farsh par ukḌūñ

kabhī gautam ke aasan meñ kabhī

tahmad se bāhar paañv phailā ke

akaḌ kar baiThtā

baar baar is vāste pahlū badaltā

jugal-garī kartā ki pairoñ meñ

hamesha jhunjhunī ke jhunjhune bajte

ajab ik mustaqil sī bekalī rahtī

vo ġhubāre phaTe paḌte the

jin par taañt sī niilī rageñ phūlī huī

nanhe-munne kechuoñ kī tarah

kunDlī maar ke baiThī huī thiiñ

jis tarah kanghā chhupāne ke liye

us ne sir-sayyad kī dāḌhī hū-ba-hū

pilpile tarbūz par

us kī luñgī mez-posh aisī paḌī rahtī

is maraz kā fā.eda itnā huā

apnī chaukī se farāġhat pā gayā

ye ki raddī phaaḌ kar

apne thaile apnī godī meñ sameTe

vo unhī par

saarī puḌyā.eñ banātā

lauñg dhaniya dār-chīnī jā.e-phal aur tej-pāt

sab masāle us kī rānoñ ke maze

chakhe hue the

ġhībatī jal-kukḌe aise the ki bas

saaf kahte is ne ka.abe kī ziyārat hī

nahīñ kī hai

faqat ajmer jā kar lauT aayā

balki ye bhī mushtaba

is pahāḌī se utarnā

dūsrī kā qasd karnā

hājiyoñ kī dhīñgā-mushtī lapā-dagī rel-pel

phir gunāhoñ ke piTāre kī tarah laTkī huī

fāltū gaThrī alag

us kī hālat ġhair thī

haj to mumkin hī nahīñ

jitne hāsid utnī bāteñ

ek roz

vo ulahnoñ se niDhāl

maut kī bāñhoñ meñ bāñheñ Daal ke

apne aaqā kī taraf

apne raaz apne mafā.īlun uThā.e chal paḌā

kisī mulk meñ ek thā bādshāh

hamārā tumhārā ḳhudā bādshāh

donon mashkize laba-lab

ek chumbak ki tarah

apni jaanib khinchte rahte use

fil-bandi qahr thi

mard gahak masKHari karte hue Darte

zara mohtat rahte

jhurjhuri ka swang bharte

aurten maghmum aankhon mein

taras kaDhe hue

apne bachchon par baras paDtin

agar wo bad-lihaz

bholpan se puchh lete

kyun nahin

us ke falanon ki tarah

un ke falane kyun nahin

wo KHudai farsh par ukDun

kabhi gautam ke aasan mein kabhi

tahmad se bahar panw phaila ke

akaD kar baiThta

bar bar is waste pahlu badalta

jugal-gari karta ki pairon mein

hamesha jhunjhuni ke jhunjhune bajte

ajab ek mustaqil si bekali rahti

wo ghubare phaTe paDte the

jin par tant si nili ragen phuli hui

nanhe-munne kechuon ki tarah

kunDli mar ke baiThi hui thin

jis tarah kangha chhupane ke liye

us ne sir-sayyad ki daDhi hu-ba-hu

pilpile tarbuz par

us ki lungi mez-posh aisi paDi rahti

is maraz ka faeda itna hua

apni chauki se faraghat pa gaya

ye ki raddi phaD kar

apne thaile apni godi mein sameTe

wo unhi par

sari puDyaen banata

laung dhaniya dar-chini jae-phal aur tej-pat

sab masale us ki ranon ke maze

chakhe hue the

ghibati jal-kukDe aise the ki bas

saf kahte is ne kabe ki ziyarat hi

nahin ki hai

faqat ajmer ja kar lauT aaya

balki ye bhi mushtaba

is pahaDi se utarna

dusri ka qasd karna

hajiyon ki dhinga-mushti lapa-dagi rel-pel

phir gunahon ke piTare ki tarah laTki hui

faltu gaThri alag

us ki haalat ghair thi

haj to mumkin hi nahin

jitne hasid utni baaten

ek roz

wo ulahnon se niDhaal

maut ki banhon mein banhen Dal ke

apne aaqa ki taraf

apne raaz apne mafailun uThae chal paDa

kisi mulk mein ek tha baadshah

hamara tumhaara KHuda baadshah