hathon ka tarana

in hāthoñ kī tāzīm karo

in hāthoñ kī takrīm karo

duniyā ke chalāne vaale haiñ

in hāthoñ ko taslīm karo

tārīḳh ke aur mashīnoñ ke pahiyoñ kī ravānī in se hai

tahzīb kī aur tamaddun kī bharpūr javānī in se hai

duniyā kā fasāna in se hai, insāñ kī kahānī in se hai

in hāthoñ kī tāzīm karo

sadiyoñ se guzar kar aa.e haiñ, ye nek aur bad ko jānte haiñ

ye dost haiñ saare aalam ke, par dushman ko pahchānte haiñ

ḳhud shaktī kā autār haiñ, ye kab ġhair kī shaktī mānte haiñ

in hāthoñ ko tāzīm karo

ek zaḳhm hamāre hāthoñ ke, ye phuul jo haiñ gul-dānoñ meñ

sūkhe hue pyāse chullū the, jo jaam haiñ ab mai-ḳhānoñ meñ

TuuTī huī sau añgḌā.iyoñ kī mehrābeñ haiñ aivānoñ meñ

in hāthoñ kī tāzīm karo

rāhoñ kī sunahrī raushniyāñ, bijlī ke jo phaile dāman meñ

fānūs hasīñ aivānoñ ke, jo rang-o-nūr ke ḳhirman meñ

ye haath hamāre jalte haiñ, ye haath hamāre raushan haiñ

in hāthoñ kī tāzīm karo

ḳhāmosh haiñ ye ḳhāmoshī se, so barbat-o-chañg banāte haiñ

tāroñ meñ raag sulāte haiñ, tabloñ meñ bol chhupāte haiñ

jab saaz meñ jumbish hotī hai, tab haath hamāre gaate haiñ

in hāthoñ kī tāzīm karo

e.ajāz hai ye in hāthoñ kaa, resham ko chhueñ to āñchal hai

patthar ko chhueñ to but kar deñ, kālakh ko chhueñ to kājal hai

miTTī ko chhueñ to sonā hai, chāñdī ko chhueñ to pāyal hai

in hāthoñ kī tāzīm karo

bahtī huī bijlī kī lahreñ, simTe hue gangā ke dhāre

dhartī ke muqaddar ke mālik, mehnat ke ufuq ke sayyāre

ye chāragarān-e-dard-e-jahāñ, sadiyoñ se magar ḳhud bechāre

in hāthoñ kī tāzīm karo

taḳhlīq ye soz-e-mehnat kii, aur fitrat ke shahkār bhī haiñ

maidān-e-amal meñ lekin ḳhud, ye ḳhāliq bhī me.amār bhī haiñ

phūloñ se bharī ye shāḳh bhī haiñ aur chaltī huī talvār bhī haiñ

in hāthoñ kī tāzīm karo

ye haath na huuñ to mohmal sab, tahrīreñ aur taqrīreñ haiñ

ye haath na hoñ to be-ma.anī insānoñ kī taqrīreñ haiñ

sab hikmat-o-dānish ilm-o-hunar in hāthoñ kī tafsīreñ haiñ

in hāthoñ kī ta.azīm karo

ye kitne subuk aur nāzuk haiñ, ye kitne siDaul aur achchhe haiñ

chālākī meñ ustād haiñ ye aur bhole-pan meñ bachche haiñ

is jhuuT kī gandī duniyā meñ bas haath hamāre sachche haiñ

in hāthoñ kī tāzīm karo

ye sarhad sarhad juḌte haiñ aur mulkoñ mulkoñ jaate haiñ

bāñhoñ meñ bāñheñ Dālte haiñ aur dil se dil ko milāte haiñ

phir zulm-o-sitam ke pairoñ kī zanjīr-e-girāñ ban jaate haiñ

in hāthoñ kī ta.azīm karo

ta.amīr to in kī fitrat hai, ik aur na.ī ta.amīr sahī

ik aur na.ī tadbīr sahī, ik aur na.ī taqdīr sahī

ik shoḳh o hasīñ ḳhvāb aur sahī ik shoḳh o hasīñ ta.abīr sahī

in hāthoñ kī ta.azīm karo

in hāthoñ kī takrīm karo

duniyā ko chalāne vaale haiñ

in hāthoñ ko taslīm karo

in hathon ki tazim karo

in hathon ki takrim karo

duniya ke chalane wale hain

in hathon ko taslim karo

tariKH ke aur mashinon ke pahiyon ki rawani in se hai

tahzib ki aur tamaddun ki bharpur jawani in se hai

duniya ka fasana in se hai, insan ki kahani in se hai

in hathon ki tazim karo

sadiyon se guzar kar aae hain, ye nek aur bad ko jaante hain

ye dost hain sare aalam ke, par dushman ko pahchante hain

KHud shakti ka autar hain, ye kab ghair ki shakti mante hain

in hathon ko tazim karo

ek zaKHm hamare hathon ke, ye phul jo hain gul-danon mein

sukhe hue pyase chullu the, jo jam hain ab mai-KHanon mein

TuTi hui sau angDaiyon ki mehraben hain aiwanon mein

in hathon ki tazim karo

rahon ki sunahri raushniyan, bijli ke jo phaile daman mein

fanus hasin aiwanon ke, jo rang-o-nur ke KHirman mein

ye hath hamare jalte hain, ye hath hamare raushan hain

in hathon ki tazim karo

KHamosh hain ye KHamoshi se, so barbat-o-chang banate hain

taron mein rag sulate hain, tablon mein bol chhupate hain

jab saz mein jumbish hoti hai, tab hath hamare gate hain

in hathon ki tazim karo

eajaz hai ye in hathon ka, resham ko chhuen to aanchal hai

patthar ko chhuen to but kar den, kalakh ko chhuen to kajal hai

miTTi ko chhuen to sona hai, chandi ko chhuen to payal hai

in hathon ki tazim karo

bahti hui bijli ki lahren, simTe hue ganga ke dhaare

dharti ke muqaddar ke malik, mehnat ke ufuq ke sayyare

ye chaaragaran-e-dard-e-jahan, sadiyon se magar KHud bechaare

in hathon ki tazim karo

taKHliq ye soz-e-mehnat ki, aur fitrat ke shahkar bhi hain

maidan-e-amal mein lekin KHud, ye KHaliq bhi meamar bhi hain

phulon se bhari ye shaKH bhi hain aur chalti hui talwar bhi hain

in hathon ki tazim karo

ye hath na hun to mohmal sab, tahriren aur taqriren hain

ye hath na hon to be-mani insanon ki taqriren hain

sab hikmat-o-danish ilm-o-hunar in hathon ki tafsiren hain

in hathon ki tazim karo

ye kitne subuk aur nazuk hain, ye kitne siDaul aur achchhe hain

chaalaki mein ustad hain ye aur bhole-pan mein bachche hain

is jhuT ki gandi duniya mein bas hath hamare sachche hain

in hathon ki tazim karo

ye sarhad sarhad juDte hain aur mulkon mulkon jate hain

banhon mein banhen Dalte hain aur dil se dil ko milate hain

phir zulm-o-sitam ke pairon ki zanjir-e-giran ban jate hain

in hathon ki tazim karo

tamir to in ki fitrat hai, ek aur nai tamir sahi

ek aur nai tadbir sahi, ek aur nai taqdir sahi

ek shoKH o hasin KHwab aur sahi ek shoKH o hasin tabir sahi

in hathon ki tazim karo

in hathon ki takrim karo

duniya ko chalane wale hain

in hathon ko taslim karo