hazir-ghaeb

ishāra kis ne toḌā hai

ki chaurāhe ke bīchoñ-bīch

ham ik dūsre se is tarah Takrā ga.e haiñ

ye chāroñ rāste

ham ne mohabbat kī kudāloñ se tarāshe the

hameñ phūloñ pe chalne kā ishāra chāhiye thā

magar rishtoñ ke bādal jo kabhī dil par baraste the

to hariyālī kā mausam chāroñ jānib phail jaatā thā

vo bādal kāñch ke mānind yuuñ TuuTe fazāoñ meñ

ki har rastā nukīlī kirchiyoñ kī surma.ī bārish meñ bhīgā hai

ye chaurāhā

ki jo apne milan kā isti.āra thā

tamāshā-gāh meñ badlā

musāfir ek-dūje ke muqābil aa hī jaate haiñ

magar apnā safar kaise tasādum meñ Dhalā āḳhir

use ik hādse kī shakl kaise aur kis ne dī

safar ko sānehe kā pairahan pahnā ke

chaurāhe ke bīchoñ-bīch istāda kiyā jis ne

use ham kis tarah DhūñDeñ

use ham kaise pahchāneñ

ki har-sū ḳhushnumā chehre kachūmar ho ke bikhre haiñ

vo malġhūba jo us andhe tasādum kā natīja hai

use kis shakl meñ Dhāleñ

ishaara kis ne toDa hai

ki chaurahe ke bichon-bich

hum ek dusre se is tarah Takra gae hain

ye chaaron raste

hum ne mohabbat ki kudalon se tarashe the

hamein phulon pe chalne ka ishaara chahiye tha

magar rishton ke baadal jo kabhi dil par baraste the

to hariyali ka mausam chaaron jaanib phail jata tha

wo baadal kanch ke manind yun TuTe fazaon mein

ki har rasta nukili kirchiyon ki surmai barish mein bhiga hai

ye chauraha

ki jo apne milan ka istiara tha

tamasha-gah mein badla

musafir ek-duje ke muqabil aa hi jate hain

magar apna safar kaise tasadum mein Dhala aaKHir

use ek hadse ki shakl kaise aur kis ne di

safar ko sanehe ka pairahan pahna ke

chaurahe ke bichon-bich istada kiya jis ne

use hum kis tarah DhunDen

use hum kaise pahchanen

ki har-su KHushnuma chehre kachumar ho ke bikhre hain

wo malghuba jo us andhe tasadum ka natija hai

use kis shakl mein Dhaalen