habib jalib

zamīr-e-vaqt kī āvāz rūh-e-asr kā karb

sameTe dāman-e-dil meñ na jaane kab se thā

hisār-e-jabr-o-sitam meñ dukhoñ kī bastī meñ

jalā.e sham.a-e-qalam ham-kalām shab se thā

harīf-e-sunnat-e-āzar kalīm-e-jāda-e-fan

sanam-kade meñ muḳhātib butoñ ke rab se thā

vo apne ahd kā mansūr harf-e-haq kā naqīb

salīb-e-vaqt pe faa.ez vo shaḳhs kab se thā

vo lab jo harf-e-sar-e-dār kā muġhannī thā

jo naġhma-ḳhvāñ sar-e-maqtal rahā ujāloñ kā

ho nazm yā ki ġhazal muḳhtalif vo sab se thā

kamāl pyaar use mansab-e-adab se thā

vo ek shaḳhs jise jān-e-fikr-o-fan kahiye

jamāl-e-dīda-varī hurmat-e-suḳhan kahiye

vo ek shaḳhs jise mash.al-e-navā kahiye

vo ek shaḳhs jise nuur kā asā kahiye

jalā.e sham.a-e-qalam ham-kalām shab se thā

salīb-e-vaqt pe faa.ez vo shaḳhs kab se thā

zamir-e-waqt ki aawaz ruh-e-asr ka karb

sameTe daman-e-dil mein na jaane kab se tha

hisar-e-jabr-o-sitam mein dukhon ki basti mein

jalae shama-e-qalam ham-kalam shab se tha

harif-e-sunnat-e-azar kalim-e-jada-e-fan

sanam-kade mein muKHatib buton ke rab se tha

wo apne ahd ka mansur harf-e-haq ka naqib

salib-e-waqt pe faez wo shaKHs kab se tha

wo lab jo harf-e-sar-e-dar ka mughanni tha

jo naghma-KHwan sar-e-maqtal raha ujalon ka

ho nazm ya ki ghazal muKHtalif wo sab se tha

kamal pyar use mansab-e-adab se tha

wo ek shaKHs jise jaan-e-fikr-o-fan kahiye

jamal-e-dida-wari hurmat-e-suKHan kahiye

wo ek shaKHs jise mashal-e-nawa kahiye

wo ek shaKHs jise nur ka asa kahiye

jalae shama-e-qalam ham-kalam shab se tha

salib-e-waqt pe faez wo shaKHs kab se tha