hairat-kada

garebāñ se pahle ye gardan

to gardan se pahle

ye mohroñ kī ḳhud par chaḌhā.ī

qalam raushnā.ī se pahle ye uñglī

to uñglī se pahle ragoñ kī tarā.ī

sadāoñ se pahle dahan ye zabāñ

aur in se bhī pahle

ye asbī kaḌhā.ī

tamāshe se pahle ye putlī

safedī kī uryāñ tanābeñ

to is se bhī pahle

añdherī lakīroñ kī khaa.ī

safar

tujh se pahle qadam

aur is se bhī pahle

irādoñ kī hai.at-kazā.ī

mire dil meñ to terī ḳhvāhish

tirī ḳhvāhishoñ se bhī pahle

guphāoñ kā baasī tanaffus

mire jīniyātī nizāmoñ kī pahlī likhā.ī

to pahle se

pahle se

pahle kī kaisī judā.ī

gareban se pahle ye gardan

to gardan se pahle

ye mohron ki KHud par chaDhai

qalam raushnai se pahle ye ungli

to ungli se pahle ragon ki tarai

sadaon se pahle dahan ye zaban

aur in se bhi pahle

ye asbi kaDhai

tamashe se pahle ye putli

safedi ki uryan tanaben

to is se bhi pahle

andheri lakiron ki khai

safar

tujh se pahle qadam

aur is se bhi pahle

iradon ki haiat-kazai

mere dil mein to teri KHwahish

teri KHwahishon se bhi pahle

guphaon ka basi tanaffus

mere jiniyati nizamon ki pahli likhai

to pahle se

pahle se

pahle ki kaisi judai