hal TeDha hai

shīshe ke badan meñ rahtā huuñ

maiñ aaj huuñ mere aage pīchhe kal haiñ

phir bhī tan-e-tanhā huuñ

hāmila miTTī ke uupar siine ke bal leTā huuñ

sar aur pair tasādum meñ haiñ

tārīkī ke pīchhe bhaag rahā huuñ

kachchī maut ke baad jūñhī zinda hotā huuñ

mere sirhāne na.ī navelī dulhan dhuup dahak uThtī hai

sar aur pair tasādum meñ haq-e-zaujiyat māthe par

sub.h savere kalima paḌh ke nahānā

fasl ke pak jaane tak khet ko paanī dete jaanā

maiñ ne yahī sunā hai

hāmila miTTī ke uupar siine ke bal leTā huuñ

bail huuñ pathrīlī khetī meñ

haañp gayā huuñ hal TeḌhā hai

ḳhassī bailoñ kī sab joḌiyāñ

pathrīle khetoñ meñ haañp chukī haiñ

biij bikherne ke aasan bhī badal chuke haiñ

jaane paidā.ish kā lamha kab aa.egā

majbūrī ke pīchhe sarpaT bhaag rahā huuñ

phīke mausamoñ aur vaqtoñ kī

umr baḌī hai haañp gayā huuñ

shishe ke badan mein rahta hun

main aaj hun mere aage pichhe kal hain

phir bhi tan-e-tanha hun

hamila miTTi ke upar sine ke bal leTa hun

sar aur pair tasadum mein hain

tariki ke pichhe bhag raha hun

kachchi maut ke baad junhi zinda hota hun

mere sirhane nai naweli dulhan dhup dahak uThti hai

sar aur pair tasadum mein haq-e-zaujiyat mathe par

subh sawere kalima paDh ke nahana

fasl ke pak jaane tak khet ko pani dete jaana

main ne yahi suna hai

hamila miTTi ke upar sine ke bal leTa hun

bail hun pathrili kheti mein

hanp gaya hun hal TeDha hai

KHassi bailon ki sab joDiyan

pathrile kheton mein hanp chuki hain

bij bikherne ke aasan bhi badal chuke hain

jaane paidaish ka lamha kab aaega

majburi ke pichhe sarpaT bhag raha hun

phike mausamon aur waqton ki

umr baDi hai hanp gaya hun