hum ahl-e-KHauf

yahī thakan ki jo in bastiyoñ pe chhā.ī hai

utar na jaa.e parindoñ ke shahparoñ meñ bhī

ye TuuTe phūTe makānāt ūñghte chhappar

charāġh-e-shām kī dhundlī sī raushnī ke amiiñ

na in kā yaar koī hai na koī nukta-chīñ

na jaane kab koī dast-e-sitam idhar aa jaa.e

aur is zarā sī bachī raushnī ko khā jaa.e

ye khilkhilāte hue hañste muskurāte log

basoñ meñ railoñ meñ manzil kī samt jaate log

koī dhamāka inheñ jaane kab uḌā jaa.e

lahū ke dhabboñ pe afsos kartā hākim-e-shahr

aur us ke baad mohabbat pe chand taqrīreñ

jo ahl-e-shahr kī peshāniyoñ pe raushan haiñ

malāl ye hai ki us ko koī na dekhegā

ham ahl-e-ḳhauf ke sīnoñ meñ jo dhaḌaktā hai

yahi thakan ki jo in bastiyon pe chhai hai

utar na jae parindon ke shahparon mein bhi

ye TuTe phuTe makanat unghte chhappar

charagh-e-sham ki dhundli si raushni ke amin

na in ka yar koi hai na koi nukta-chin

na jaane kab koi dast-e-sitam idhar aa jae

aur is zara si bachi raushni ko kha jae

ye khilkhilate hue hanste muskuraate log

bason mein railon mein manzil ki samt jate log

koi dhamaka inhen jaane kab uDa jae

lahu ke dhabbon pe afsos karta hakim-e-shahr

aur us ke baad mohabbat pe chand taqriren

jo ahl-e-shahr ki peshaniyon pe raushan hain

malal ye hai ki us ko koi na dekhega

hum ahl-e-KHauf ke sinon mein jo dhaDakta hai