hum apne jazba-e-dil se muhayya ek jahan kar len

tasallut laakh ye sayyād-o-barq-o-bāġhbāñ kar leñ

nahīñ mumkin ki ham bāhar chaman se āshiyāñ kar leñ

badal deñ ye zamīñ paidā nayā ik āsmāñ kar leñ

ham apne jazba-e-dil se muhayyā ik jahāñ kar leñ

abhī sab daġhdaġha miT jaa.e ye sayyād-o-gulchīñ kā

jo ham paidā shu'ūr-e-zindagī-e-gulistāñ kar leñ

zamāna de rahā hai dā'vat-e-bedārī-o-jur.at

nigāh-o-dil ko āmāda barā-e-imtihāñ kar leñ

pahuñch jaa.eñ ham istiqlāl kī aisī bulandī par

nazar mustaġhnī-e-hangāma-e-sūd-o-ziyāñ kar leñ

abhī ho jaa.eñ pāra-pāra sab aa'dā kī tadbīreñ

zarā ham mujtama' apne agar tāb-o-tavāñ kar leñ

guzar achchhā nahīñ har dam ye zid par āshiyāne kī

bas apnā rāsta hī muḳhtalif ab bijliyāñ kar leñ

badal jaa.e abhī 'in'ām' nazm-e-shorish-e-bātil

zarā ham ittibā’-e-mashrab-e-rūhāniyāñ kar leñ

tasallut lakh ye sayyaad-o-barq-o-baghban kar len

nahin mumkin ki hum bahar chaman se aashiyan kar len

badal den ye zamin paida naya ek aasman kar len

hum apne jazba-e-dil se muhayya ek jahan kar len

abhi sab daghdagha miT jae ye sayyaad-o-gulchin ka

jo hum paida shu'ur-e-zindagi-e-gulistan kar len

zamana de raha hai da'wat-e-bedari-o-jurat

nigah-o-dil ko aamada bara-e-imtihan kar len

pahunch jaen hum istiqlal ki aisi bulandi par

nazar mustaghni-e-hangama-e-sud-o-ziyan kar len

abhi ho jaen para-para sab aa'da ki tadbiren

zara hum mujtama' apne agar tab-o-tawan kar len

guzar achchha nahin har dam ye zid par aashiyane ki

bas apna rasta hi muKHtalif ab bijliyan kar len

badal jae abhi 'in'am' nazm-e-shorish-e-baatil

zara hum ittiba’-e-mashrab-e-ruhaniyan kar len