ہم اپنے جذبۂ دل سے مہیا اک جہاں کر لیں

تسلط لاکھ یہ صیاد و برق و باغباں کر لیں

نہیں ممکن کہ ہم باہر چمن سے آشیاں کر لیں

بدل دیں یہ زمیں پیدا نیا اک آسماں کر لیں

ہم اپنے جذبۂ دل سے مہیا اک جہاں کر لیں

ابھی سب دغدغہ مٹ جائے یہ صیاد و گلچیں کا

جو ہم پیدا شعور زندگیٔ گلستاں کر لیں

زمانہ دے رہا ہے دعوت بیداری و جرأت

نگاہ و دل کو آمادہ برائے امتحاں کر لیں

پہنچ جائیں ہم استقلال کی ایسی بلندی پر

نظر مستغنیٔ ہنگامۂ سود و زیاں کر لیں

ابھی ہو جائیں پارہ پارہ سب اعدا کی تدبیریں

ذرا ہم مجتمع اپنے اگر تاب و تواں کر لیں

گزر اچھا نہیں ہر دم یہ ضد پر آشیانے کی

بس اپنا راستہ ہی مختلف اب بجلیاں کر لیں

بدل جائے ابھی انعامؔ نظم شورش باطل

ذرا ہم اتباع مشرب روحانیاں کر لیں