hum be-watan KHwabon ke jolahe hain

bahut sī āvāz jamā kar ke

ek chīḳh banā.ī jā saktī hai

bahut thoḌe lafzoñ se

ek bāġhī nazm banā.ī jā saktī hai

lekin

zinda qabristān meñ ek nazm kā katba kaafī nahīñ

qabreñ dam sādhe paḌī haiñ

hamārī maa.eñ murda bachchoñ ko janm de rahī haiñ

lāsheñ shanāḳht karte hue hujūm apnā chehrā

bhuul jaatā hai!

ham zindagī se sohbat karne nikle the

aur zindagī ne hamāre ḳhusiyoñ se keñche banā liye

hamāre lahū meñ chyūñTiyāñ reñgtī haiñ

magar ham apnī marzī se khujlī tak nahīñ kar sakte

qatār meñ khaḌe khaḌe ham dūsroñ se muḳhtalif kaise ho ga.e!!!

zindagī mīzān hotī to ham us ke palḌe apne vajūdoñ se bhar dete

magar kyā kareñ ki ham ḳhud apnī nazroñ meñ bahut be-vazn the

hatheliyoñ meñ surāḳh hoñ to āñkheñ kahāñ sambhāleñ

ham ne sirf chehre nibhā.e rishte nahīñ

pyāsī zamīnoñ meñ aañsū kāsht kar ke bhī

buuñd bhar hariyālī nahīñ khilī

ham saarī umr apne ḳhvāboñ ke jolāhe bane rahe

aur apne bachchoñ ke liye ek sāya-dār parcham na bun sake

hamārī miTTī mahz miTTī rahī

kabhī vatan na ban pā.ī!!!

bahut si aawaz jama kar ke

ek chiKH banai ja sakti hai

bahut thoDe lafzon se

ek baghi nazm banai ja sakti hai

lekin

zinda qabristan mein ek nazm ka katba kafi nahin

qabren dam sadhe paDi hain

hamari maen murda bachchon ko janm de rahi hain

lashen shanaKHt karte hue hujum apna chehra

bhul jata hai!

hum zindagi se sohbat karne nikle the

aur zindagi ne hamare KHusiyon se kenche bana liye

hamare lahu mein chyunTiyan rengti hain

magar hum apni marzi se khujli tak nahin kar sakte

qatar mein khaDe khaDe hum dusron se muKHtalif kaise ho gae!!!

zindagi mizan hoti to hum us ke palDe apne wajudon se bhar dete

magar kya karen ki hum KHud apni nazron mein bahut be-wazn the

hatheliyon mein suraKH hon to aankhen kahan sambhaalen

hum ne sirf chehre nibhae rishte nahin

pyasi zaminon mein aansu kasht kar ke bhi

bund bhar hariyali nahin khili

hum sari umr apne KHwabon ke jolahe bane rahe

aur apne bachchon ke liye ek saya-dar parcham na bun sake

hamari miTTi mahz miTTi rahi

kabhi watan na ban pai!!!