hum intizar mein hain

ye surḳh jang jo barpā huī hai sarhad par

ye tez aag jo phailī hai kohsāroñ meñ

ziyāda roz na chhiḌkegī vādiyoñ meñ lahū

ziyāda der na Thahregī lāla-zāroñ meñ

shikast khā.eñge bād-e-shimāl ke jhoñke

rag-e-numū abhī zinda hai shāḳh-sāroñ meñ

baḌe ġhurūr se aa.e haiñ dushmanān-e-vatan

inheñ bahā do inhī ke lahū ke dhāroñ meñ

jahāñ se qāfila-e-nau-bahār guzregā

charāġh tum ne jalā.e haiñ in dayāroñ meñ

duā.eñ deñge tumhāre badan ke zaḳhmoñ ko

khileñge phuul jo agle baras bahāroñ meñ

fanā-nasīb haiñ dushman ke hausloñ ke mahal

inheñ milā do himāla ke sang-pāroñ meñ

jahāñ se qāfila-e-nau-bahār guzregā

charāġh tum ne jalā.e haiñ un dayāroñ meñ

duā.eñ deñge tumhāre badan ke zaḳhmoñ ko

khileñge phuul jo agle baras bahāroñ meñ

fanā-nasīb haiñ dushman ke hausloñ ke mahal

unheñ milā do himāla ke sang pāroñ meñ

hamārī ruuh kī āvāz hai yaqīn karo

tumhārā naam bhī shāmil ho jāñ-nisāroñ meñ

tumhāre haath meñ sab se buland parcham ho

chaleñ vatan ke sipāhī jahāñ qatāroñ meñ

tumhāre hoñToñ pe naġhme hoñ kāmrānī ke

tumhāre paañv kī miTTī uḌe sitāroñ meñ

hamārī fikr na karnā ki ham udaas nahīñ

vatan ke naam pe jī leñge ḳhārzāroñ meñ

ḳhizāñ ke zaḳhm se do din lahū Tapaktā hai

phir us kī yaad bhī aatī nahīñ bahāroñ meñ

dam-e-vidā.a jo pal-bhar ko dil meñ jaagā thā

vo dard Duub gayā āñsūoñ kī dhāroñ meñ

vo is hasīn judā.ī kā lutf kyā jāneñ

hameñ jo log samajhte haiñ sogvāroñ meñ

ham apne ghar meñ akele haiñ aur nahīñ bhī haiñ

tumhārī yaad kī ḳhushbū hai ġham-gusāroñ meñ

tumheñ qasam jo mohabbat kī aag yaad aa.e

himālya ke saman-posh barf zāroñ meñ

tumheñ qasam jo hamārā suhāg yaad aa.e

mahāz-e-jang pe talvār ke hisāroñ meñ

kab aa rahe ho likho fat.h kā nishāñ le kar

ham intizār meñ haiñ nazr-e-jism-o-jāñ le kar

ye surKH jang jo barpa hui hai sarhad par

ye tez aag jo phaili hai kohsaron mein

ziyaada roz na chhiDkegi wadiyon mein lahu

ziyaada der na Thahregi lala-zaron mein

shikast khaenge baad-e-shimal ke jhonke

rag-e-numu abhi zinda hai shaKH-saron mein

baDe ghurur se aae hain dushmanan-e-watan

inhen baha do inhi ke lahu ke dhaaron mein

jahan se qafila-e-nau-bahaar guzrega

charagh tum ne jalae hain in dayaron mein

duaen denge tumhaare badan ke zaKHmon ko

khilenge phul jo agle baras bahaaron mein

fana-nasib hain dushman ke hauslon ke mahal

inhen mila do himala ke sang-paron mein

jahan se qafila-e-nau-bahaar guzrega

charagh tum ne jalae hain un dayaron mein

duaen denge tumhaare badan ke zaKHmon ko

khilenge phul jo agle baras bahaaron mein

fana-nasib hain dushman ke hauslon ke mahal

unhen mila do himala ke sang paron mein

hamari ruh ki aawaz hai yaqin karo

tumhaara nam bhi shamil ho jaan-nisaron mein

tumhaare hath mein sab se buland parcham ho

chalen watan ke sipahi jahan qataron mein

tumhaare honTon pe naghme hon kaamrani ke

tumhaare panw ki miTTi uDe sitaron mein

hamari fikr na karna ki hum udas nahin

watan ke nam pe ji lenge KHarzaron mein

KHizan ke zaKHm se do din lahu Tapakta hai

phir us ki yaad bhi aati nahin bahaaron mein

dam-e-widaa jo pal-bhar ko dil mein jaga tha

wo dard Dub gaya aansuon ki dhaaron mein

wo is hasin judai ka lutf kya jaanen

hamein jo log samajhte hain sogwaron mein

hum apne ghar mein akele hain aur nahin bhi hain

tumhaari yaad ki KHushbu hai gham-gusaron mein

tumhein qasam jo mohabbat ki aag yaad aae

himalya ke saman-posh barf zaron mein

tumhein qasam jo hamara suhag yaad aae

mahaz-e-jang pe talwar ke hisaron mein

kab aa rahe ho likho fath ka nishan le kar

hum intizar mein hain nazr-e-jism-o-jaan le kar