hum itni jaldi mein the

galī meñ gahrā añdherā thā

añdhere kī lāThī ko thāme hue

chor qadmoñ se ham ne apnī raah lī thī

ham itnī jaldī meñ the

ki apne paañv ke nishān to brief-casoñ meñ bhar liye

magar paañv vahīñ chhoḌ diye

abbū ne apnī ainak bakse meñ rakh lī

āñkheñ mez kī darāz hī meñ chhoḌ aa.e

ammāñ ne imām-e-zāmin mere baazū meñ bāñdhā

aur jaldī meñ mere baazū galī ke nukkaḌ par hī chhūT ga.e

train abhī platform par hī lagtī thī

log ek dūsre ko rauñdte hue bhāge jā rahe the

ki sab ke sab jaldī meñ the

ham itnī jaldī meñ the

aur jaldī meñ aksar aisā hotā hai

musalle hamāre saath the

aur namāzeñ vahīñ bhuul ga.e

tāqoñ meñ dharī kī dharī rah ga.iiñ

duā.eñ agar-battiyāñ aur lobān

biivī nīñdeñ rakhnā bhuul ga.ī thī

gumā diye the us ne saare ḳhvāb

aur le aa.ī thī apne saath hairat-zada sunsān āñkheñ

ham itnī jaldī meñ the

ki hamāre sandūq dūsroñ ke sandūq se badal ga.e

jin meñ thiiñ zillateñ hijrateñ dard kī Thokareñ

aur lambe hote hue ḳhauf ke dev

chalte chalte

kisī ne ek gaThrī thamā dī thī

gaThrī kyā thī ek amānat thī

bhāgte aur sañbhālte hue hamāre saroñ se gir paḌī

aur us se bāhar nikal aa.iiñ

chīḳheñ bhuuk bachchoñ kī yatīmī kaTī phaTī ismateñ

ek paḌosī jo is dauḌ meñ hamāre saath hī thā

apnī hañsī ek dhūl-bhare bistar meñ chhoḌ aayā

jaise ham apnī muskurāhaTeñ bhuul aa.e the

gali mein gahra andhera tha

andhere ki laThi ko thame hue

chor qadmon se hum ne apni rah li thi

hum itni jaldi mein the

ki apne panw ke nishan to brief-cason mein bhar liye

magar panw wahin chhoD diye

abbu ne apni ainak bakse mein rakh li

aankhen mez ki daraaz hi mein chhoD aae

amman ne imam-e-zamin mere bazu mein bandha

aur jaldi mein mere bazu gali ke nukkaD par hi chhuT gae

train abhi platform par hi lagti thi

log ek dusre ko raundte hue bhage ja rahe the

ki sab ke sab jaldi mein the

hum itni jaldi mein the

aur jaldi mein aksar aisa hota hai

musalle hamare sath the

aur namazen wahin bhul gae

taqon mein dhari ki dhari rah gain

duaen agar-battiyan aur loban

biwi ninden rakhna bhul gai thi

guma diye the us ne sare KHwab

aur le aai thi apne sath hairat-zada sunsan aankhen

hum itni jaldi mein the

ki hamare sanduq dusron ke sanduq se badal gae

jin mein thin zillaten hijraten dard ki Thokaren

aur lambe hote hue KHauf ke dew

chalte chalte

kisi ne ek gaThri thama di thi

gaThri kya thi ek amanat thi

bhagte aur sanbhaalte hue hamare saron se gir paDi

aur us se bahar nikal aain

chiKHen bhuk bachchon ki yatimi kaTi phaTi ismaten

ek paDosi jo is dauD mein hamare sath hi tha

apni hansi ek dhul-bhare bistar mein chhoD aaya

jaise hum apni muskurahaTen bhul aae the