hum KHwab-zada

ham ḳhvāb-zada

piile mausam ke añgāroñ se jale hue

palkoñ meñ rañg-birañge ḳhāke bhare hue

sāñsoñ ko roke hue

musalsal ḳhvābīda haiñ

dekh rahe haiñ ḳhud ko jañgal aur pahāḌoñ ke shānoñ par uḌte hue

aag ugalte jharnoñ kī bāñhoñ meñ naġhme gaate hue

ḳhush-paikar rū-posh parindoñ ke ham-rāh fazā kī vus.at ko larzīda karte hue

sayyāroñ aur kahkashāoñ kī duniyā se bhī kuchh aage baḌhte hue

niile sāgar ke gahre siine meñ parbat kī choTī par mūñge kī gul-rañg chaTTānoñ par

lahroñ se laḌte hue

ham ḳhvāb-zada piile mausam ke añgāroñ se jale hue

jiine kī ḳhvāhish meñ aise lamhe roz churā lete haiñ

ḳhud se ḳhud kā karb isī tevar se roz chhupā lete haiñ

āñkheñ kyā khultī haiñ pāgal bārah-singhoñ ke hamloñ se

ḳhud ko ghirā huā paate haiñ

ham himmat ke dhanī khaḌe to ho jaate haiñ

lekin ik ifrīt hamāre pairoñ ko yuuñ kas letā hai

ham behis aur be-dast-o-pā ho jaate haiñ

ḳhvāboñ kī vaadī meñ pahuñch kar

ḳhaak samundar aur ḳhalā ke

sab rañgoñ se haath milā ke hañs paḌte haiñ

palkoñ ke sad-rañg tilismoñ kī bāhoñ meñ āḳhir kab tak

ham sāñso ko bahlā.eñge

lamhoñ ke is jabr-e-musalsal se ḳhud ko kab rihā kareñge

ham ḳhvāb-zada piile mausam ke añgāroñ se jale hue

hum KHwab-zada

pile mausam ke angaron se jale hue

palkon mein rang-birange KHake bhare hue

sanson ko roke hue

musalsal KHwabida hain

dekh rahe hain KHud ko jangal aur pahaDon ke shanon par uDte hue

aag ugalte jharnon ki banhon mein naghme gate hue

KHush-paikar ru-posh parindon ke ham-rah faza ki wusat ko larzida karte hue

sayyaron aur kahkashaon ki duniya se bhi kuchh aage baDhte hue

nile sagar ke gahre sine mein parbat ki choTi par munge ki gul-rang chaTTanon par

lahron se laDte hue

hum KHwab-zada pile mausam ke angaron se jale hue

jine ki KHwahish mein aise lamhe roz chura lete hain

KHud se KHud ka karb isi tewar se roz chhupa lete hain

aankhen kya khulti hain pagal barah-singhon ke hamlon se

KHud ko ghira hua pate hain

hum himmat ke dhani khaDe to ho jate hain

lekin ek ifrit hamare pairon ko yun kas leta hai

hum behis aur be-dast-o-pa ho jate hain

KHwabon ki wadi mein pahunch kar

KHak samundar aur KHala ke

sab rangon se hath mila ke hans paDte hain

palkon ke sad-rang tilismon ki bahon mein aaKHir kab tak

hum sanso ko bahlaenge

lamhon ke is jabr-e-musalsal se KHud ko kab riha karenge

hum KHwab-zada pile mausam ke angaron se jale hue