ہم کیا مانگتے ہیں

نہ دنیا کا ہم مال و زر مانگتے ہیں

کسی سے نہ القاب سر مانگتے ہیں

نہ پکھراج لعل و گہر مانگتے ہیں

شرافت کا جینا مگر مانگتے ہیں

ہمیں جذبۂ حب قومی عطا کر

یہی حق سے شام و سحر مانگتے ہیں

ملا دے جو سینوں میں دل ظالموں کے

وہ آہوں میں اپنی اثر مانگتے ہیں

بگڑنے کی تو بات ہی کچھ نہیں ہے

حضور ہم تو اپنا ہی گھر مانگتے ہیں

بتا قوم غافل یہ کیا ماجرا ہے

ترے بچے کیوں در بدر مانگتے ہیں

علیؔ جان لو وہ ہیں دشمن وطن کے

جو ان سے کرم کی نظر مانگتے ہیں