hum kya mangte hain

na duniyā kā ham māl-o-zar māñgte haiñ

kisī se na alqāb-e-sir māñgte haiñ

na pokhrāj la.al-o-gohar māñgte haiñ

sharāfat kā jiinā magar māñgte haiñ

hameñ jazba-e-hubb-e-qaumī atā kar

yahī haq se shām-o-sahar māñgte haiñ

milā de jo sīnoñ meñ dil zālimoñ ke

vo aahoñ meñ apnī asar māñgte haiñ

bigaḌne kī to baat hī kuchh nahīñ hai

huzūr ham to apnā hī ghar māñgte haiñ

batā qaum-e-ġhāfil ye kyā mājrā hai

tire bachche kyoñ dar-ba-dar māñgte haiñ

'alī' jaan lo vo haiñ dushman vatan ke

jo un se karam kī nazar māñgte haiñ

na duniya ka hum mal-o-zar mangte hain

kisi se na alqab-e-sir mangte hain

na pokhraj lal-o-gohar mangte hain

sharafat ka jina magar mangte hain

hamein jazba-e-hubb-e-qaumi ata kar

yahi haq se sham-o-sahar mangte hain

mila de jo sinon mein dil zalimon ke

wo aahon mein apni asar mangte hain

bigaDne ki to baat hi kuchh nahin hai

huzur hum to apna hi ghar mangte hain

bata qaum-e-ghafil ye kya majra hai

tere bachche kyon dar-ba-dar mangte hain

'ali' jaan lo wo hain dushman watan ke

jo un se karam ki nazar mangte hain