hum log

aao us yaad ko siine se lagā kar so jaa.eñ

aao socheñ ki bas ik ham hī nahīñ tīrah-nasīb

apne aise ka.ī āshufta-jigar aur bhī haiñ

ek be-nām thakan ek pur-asrār kasak

dil pe vo bojh ki bhūle se bhī pūchhe jo koī

aañkh se jaltī huī ruuh kā laavā bah jaa.e

chārasāzī ke har andāz kā gahrā nashtar

ġham-gusārī kī rivāyāt meñ uljhe hue zaḳhm

dardmandī kī ḳharāsheñ jo miTā.e na miTeñ

apne aise ka.ī āshufta-jigar aur bhī haiñ

lekin ai vaqt vo sāhib-nazrāñ kaise haiñ

koī us des kā mil jaa.e to itnā pūchheñ

āj-kal apne masīhā-nafsāñ kaise haiñ

āñdhiyāñ to ye sunā hai ki udhar bhī aa.iiñ

koñpleñ kaisī haiñ shīshoñ ke makāñ kaise haiñ

aao us yaad ko sine se laga kar so jaen

aao sochen ki bas ek hum hi nahin tirah-nasib

apne aise kai aashufta-jigar aur bhi hain

ek be-nam thakan ek pur-asrar kasak

dil pe wo bojh ki bhule se bhi puchhe jo koi

aankh se jalti hui ruh ka lawa bah jae

chaarasazi ke har andaz ka gahra nashtar

gham-gusari ki riwayat mein uljhe hue zaKHm

dardmandi ki KHarashen jo miTae na miTen

apne aise kai aashufta-jigar aur bhi hain

lekin ai waqt wo sahib-nazran kaise hain

koi us des ka mil jae to itna puchhen

aaj-kal apne masiha-nafsan kaise hain

aandhiyan to ye suna hai ki udhar bhi aain

konplen kaisi hain shishon ke makan kaise hain