humne KHwahishon ke sare parinde uDa diye hain

shurūa shurūa meñ achambhe achchhe lagte the

shauq bhī thā aur din bhī bhale the

achchhe logoñ se milne kā shauq junūn kī had tak

har lamha betāb liye phirtā thā

jab koī apnā hero

apne ādarsh kā paikar sāmne aatā

jī ye chāhtā

āñkheñ bichhā.eñ dil meñ biThā.eñ

bāteñ suneñ itnī bāteñ

sail-e-zamāñ se ūñchī bāteñ

dil ke gahre ġham kī bāteñ

duurī aur nazdīkī

lafz bahut chhoTe haiñ

un lafzoñ ko parkho to

insān aur bhī chhoTe nikalte haiñ

paas bulā kar jise dekho

us kā chehra faq be-rañg

bhabhūt kī sūrat kaalā kaalā

kyā sūraj bahut nīche aa gayā hai

kyā maaoñ ne bachche jan kar

duudh pilānā chhoḌ diyā hai

goliyāñ khā ke duudh ke sote

ḳhushk karne vaalī maaoñ

plastic ke bags meñ rāt-rāt-bhar

bachchoñ kā peshāb jazb karne vaalī maaoñ

niiñd tumhārī bahut mīThī hai

Thiik hai tum bhī bebas ho

mard gharoñ se ġhā.eb hoñ to

maañ kī māmtā bilak bilak kar

niiñd kī golī ke āñgan meñ so hī jaayā kartī hai

ḳhvāb-āvar golī

ye bhī to aaj kī aham zarūrat hai

masnūī palkeñ āñkhoñ se utaar ke

aslī chehra mat dekho

goliyāñ khaao so jaao ārām karo

sub.h tumhāre sar ke uupar sūraj kī

aur bhī garm shuā.eñ raqs kareñgī

achchhe log sub.h ko kuchh aur shaam ko kuchh

aur raat ko un ke ḳhuun kī tuġhyānī meñ

un ke haath aur un kī āñkheñ

bilkul jañgalī chūhe jaisī ma.alūm hoñ

pahle-pahal ye achambhā thā

ḳhauf kī tah meñ anjāne ko jānñe kī ḳhvāhish

makḌī ke jaale kī mānind phailī

pahle-pahal pistānoñ meñ dard kī Tīseñ bahut uThīñ

phir yaad nahīñ

masnūī palkeñ itnī lambī haiñ

maiñ apne pair ke naqsh ke aage dekh nahīñ saktī huuñ

kahte haiñ ki havā chalī hai

khep na.e logoñ kī

jin ko achchhā kahne vaale saath saath haiñ

pahuñch ga.e haiñ shahr kināre

sūraj ab to itnā nīche aa pahuñchā hai

us ko uThā ke duur kisī kone meñ dafan karo

raat kī chādar oḌhne se pahchān kā rishta

shukr ḳhudāyā TuuT to jaatā hai

ai rab tū vālī-e-kaun-o-makāñ

tū sab ke diloñ ke haal se vāqif hai

to ham ko batā ham kyā socheñ

ham ne ḳhvāhishoñ ke saare parinde uḌā diye haiñ

shurua shurua mein achambhe achchhe lagte the

shauq bhi tha aur din bhi bhale the

achchhe logon se milne ka shauq junun ki had tak

har lamha betab liye phirta tha

jab koi apna hero

apne aadarsh ka paikar samne aata

ji ye chahta

aankhen bichhaen dil mein biThaen

baaten sunen itni baaten

sail-e-zaman se unchi baaten

dil ke gahre gham ki baaten

duri aur nazdiki

lafz bahut chhoTe hain

un lafzon ko parkho to

insan aur bhi chhoTe nikalte hain

pas bula kar jise dekho

us ka chehra faq be-rang

bhabhut ki surat kala kala

kya suraj bahut niche aa gaya hai

kya maon ne bachche jan kar

dudh pilana chhoD diya hai

goliyan kha ke dudh ke sote

KHushk karne wali maon

plastic ke bags mein raat-raat-bhar

bachchon ka peshab jazb karne wali maon

nind tumhaari bahut miThi hai

Thik hai tum bhi bebas ho

mard gharon se ghaeb hon to

man ki mamta bilak bilak kar

nind ki goli ke aangan mein so hi jaya karti hai

KHwab-awar goli

ye bhi to aaj ki aham zarurat hai

masnui palken aankhon se utar ke

asli chehra mat dekho

goliyan khao so jao aaram karo

subh tumhaare sar ke upar suraj ki

aur bhi garm shuaen raqs karengi

achchhe log subh ko kuchh aur sham ko kuchh

aur raat ko un ke KHun ki tughyani mein

un ke hath aur un ki aankhen

bilkul jangali chuhe jaisi malum hon

pahle-pahal ye achambha tha

KHauf ki tah mein anjaane ko jaanne ki KHwahish

makDi ke jale ki manind phaili

pahle-pahal pistanon mein dard ki Tisen bahut uThin

phir yaad nahin

masnui palken itni lambi hain

main apne pair ke naqsh ke aage dekh nahin sakti hun

kahte hain ki hawa chali hai

khep nae logon ki

jin ko achchha kahne wale sath sath hain

pahunch gae hain shahr kinare

suraj ab to itna niche aa pahuncha hai

us ko uTha ke dur kisi kone mein dafan karo

raat ki chadar oDhne se pahchan ka rishta

shukr KHudaya TuT to jata hai

ai rab tu wali-e-kaun-o-makan

tu sab ke dilon ke haal se waqif hai

to hum ko bata hum kya sochen

hum ne KHwahishon ke sare parinde uDa diye hain