ham-sae ke nam

kuchh tum ne kahā

kuchh maiñ ne kahā

aur baḌhte baḌhte baat baḌhī

dil uub gayā

dil Duub gayā

aur gahrī kaalī raat baḌhī

tum apne ghar

maiñ apne ghar

saare darvāze band kiye

baiThe haiñ kaḌve ghūñT piye

oḌhe haiñ ġhusse kī chādar

kuchh tum socho

kuchh maiñ sochūñ

kyuuñ ūñchī haiñ ye dīvāreñ

kab tak ham in par sar māreñ

kab tak ye añdhere rahne haiñ

kiina ke ye ghere rahne haiñ

chalo apne darvāze kholeñ

aur ghar ke bāhar aa.eñ ham

dil Thahre jahāñ haiñ barsoñ se

vo ik nukkaḌ hai nafrat kā

kab tak is nukkaḌ par Thahreñ

ab is ke aage jaa.eñ ham

bas thoḌī duur ik dariyā hai

jahāñ ek ujālā bahtā hai

vaañ lahroñ lahroñ haiñ kirneñ

aur kirnoñ kirnoñ haiñ lahreñ

in kirnoñ meñ

in lahroñ meñ

ham dil ko ḳhuub nahāne deñ

sīnoñ meñ jo ik patthar hai

us patthar ko ghul jaane deñ

dil ke ik kone meñ bhī chhupī

gar thoḌī sī bhī nafrat hai

is nafrat ko dhul jaane deñ

donoñ kī taraf se jis din bhī

iz.hār nadāmat kā hogā

tab jashn mohabbat kā hogā

kuchh tum ne kaha

kuchh main ne kaha

aur baDhte baDhte baat baDhi

dil ub gaya

dil Dub gaya

aur gahri kali raat baDhi

tum apne ghar

main apne ghar

sare darwaze band kiye

baiThe hain kaDwe ghunT piye

oDhe hain ghusse ki chadar

kuchh tum socho

kuchh main sochun

kyun unchi hain ye diwaren

kab tak hum in par sar maren

kab tak ye andhere rahne hain

kina ke ye ghere rahne hain

chalo apne darwaze kholen

aur ghar ke bahar aaen hum

dil Thahre jahan hain barson se

wo ek nukkaD hai nafrat ka

kab tak is nukkaD par Thahren

ab is ke aage jaen hum

bas thoDi dur ek dariya hai

jahan ek ujala bahta hai

wan lahron lahron hain kirnen

aur kirnon kirnon hain lahren

in kirnon mein

in lahron mein

hum dil ko KHub nahane den

sinon mein jo ek patthar hai

us patthar ko ghul jaane den

dil ke ek kone mein bhi chhupi

gar thoDi si bhi nafrat hai

is nafrat ko dhul jaane den

donon ki taraf se jis din bhi

izhaar nadamat ka hoga

tab jashn mohabbat ka hoga