hum shair hote hain

ham paidā karte haiñ

ham giilī miTTī ko muTThī meñ bhīñchā karte haiñ

to shakleñ bantī haiñ

ham un kī choñcheñ khol ke sāñseñ phūñkā karte haiñ

jo miTTī the vo chhū lene se taa.ir hote haiñ

ham shā.ir hote haiñ

kan.ān meñ rahte haiñ

jab jalva karte haiñ

to shashdar añgushtoñ ko poreñ nashtar detī haiñ

phir ḳhuun Tapaktā hai jo sard nahīñ hotā

ik sahmā sā sakta hotā hai dard nahīñ hotā

yūnān ke Daaku haiñ

ham devtāoñ ke mahal meñ naqab lagāyā karte haiñ

ham āsmān kā niilā shah-darvāza toḌte haiñ

ham aag churāte haiñ

to is duniyā kī yaḳh choTī se barf pighaltī hai

phir jame hue siine milte haiñ

saañs humaktī hai

aur shiryānoñ ke muñh khulte haiñ

ḳhuun dhaḌaktā hai

jīvan-rāmāyan meñ

jab rāvan istibdādī kārobār chalātā hai

ham siitā likhte haiñ

jab rath ke pahiye jismoñ ke poshāk kuchalte haiñ

to giitā likhte haiñ

jab hoñToñ ke sahme kapḌoñ par baḳhiya hotā hai

ham bolā karte haiñ

jab manDī se ek ek tarāzū ġhā.eb hotā hai

to jīvan ko mīzān pe rakh kar tolā karte haiñ

mazdūrī karte haiñ

ham lafzoñ ke jañgal se lakḌī kaaTā karte haiñ

ham arkashī ke māhir haiñ ambār lagāte haiñ

phir randa pherte haiñ phir barmā dete haiñ

phir budh milāte haiñ phir chuul biThāte haiñ

ham thoḌe thoḌe hote haiñ

is bharī bharā.ī duniyā meñ ham kam-kam hote haiñ

jab shahr meñ jañgal dar aa.e aur us kā chalan jañglā.e

to ham ġhaar se aate haiñ

jab jañgal shahr kī zad meñ ho aur us kā sukūñ shahrā.e

to bargad se nikalte haiñ

ham thoḌe thoḌe hote haiñ

ham kam-kam hote haiñ

ham shā.ir hote haiñ

hum paida karte hain

hum gili miTTi ko muTThi mein bhincha karte hain

to shaklen banti hain

hum un ki chonchen khol ke sansen phunka karte hain

jo miTTi the wo chhu lene se tair hote hain

hum shair hote hain

kanan mein rahte hain

jab jalwa karte hain

to shashdar angushton ko poren nashtar deti hain

phir KHun Tapakta hai jo sard nahin hota

ek sahma sa sakta hota hai dard nahin hota

yunan ke Daku hain

hum dewtaon ke mahal mein naqab lagaya karte hain

hum aasman ka nila shah-darwaza toDte hain

hum aag churaate hain

to is duniya ki yaKH choTi se barf pighalti hai

phir jame hue sine milte hain

sans humakti hai

aur shiryanon ke munh khulte hain

KHun dhaDakta hai

jiwan-ramayan mein

jab rawan istibdadi karobar chalata hai

hum sita likhte hain

jab rath ke pahiye jismon ke poshak kuchalte hain

to gita likhte hain

jab honTon ke sahme kapDon par baKHiya hota hai

hum bola karte hain

jab manDi se ek ek taraazu ghaeb hota hai

to jiwan ko mizan pe rakh kar tola karte hain

mazduri karte hain

hum lafzon ke jangal se lakDi kaTa karte hain

hum arkashi ke mahir hain ambar lagate hain

phir randa pherte hain phir barma dete hain

phir budh milate hain phir chul biThate hain

hum thoDe thoDe hote hain

is bhari bharai duniya mein hum kam-kam hote hain

jab shahr mein jangal dar aae aur us ka chalan janglae

to hum ghaar se aate hain

jab jangal shahr ki zad mein ho aur us ka sukun shahrae

to bargad se nikalte hain

hum thoDe thoDe hote hain

hum kam-kam hote hain

hum shair hote hain